Umkhokheli welinye lamacele eMDC uMnu Morgan Tsvangirai seze wathola i passport yakhe, njalo setholile lencwadi evela kuMongameli Robert Mugabe emnxusa ukuthi abe yingxenye yohulumende womanyano phakathi kweZanu PF leMDC.
Abazi ngokwenzakalayo batshele iStudio 7 ukuthi uTsvangirai uthole ipassport yakhe izolo eseBotswana lapho aselesikhathi eside ehlezi khona. Bathi njalo incwadi yokumnxusa ukuthi angene kuhulumende womanyano abeyinhloko yawo, uPrime Minister -- uyithole izolo, eyinikezwe ngumeli weSouth Africa eBotswana.
UTsvangirai ubeselesikhathi eside eseBotswana esithi kenelisi ukubuyela eZimbabwe ngoba engela passport. Njengoba seyitholile ipasa yakhe, abantu abanengi sebekhangelele ukuthi abuyele eZimbabwe ayekhulumisana labasekeli bakhe.
Isikhulumi sikaTsvangirai, uMnu George Sibotshiwe ugcizelele amazwi kaTsvangirai awethule kuviki edluleyo esithi ibandla lakhe lizaphuma kunkulumo zokubumba uhulumende womanyano kungafika umhlaka 1 Zibandlela bonke abathunjiweyo bengakhululwa.
Simbuza usibotshiwe ukuthi njengoba setholile i passport yakhe uTsvangirai, uzabuyela nini eZimbabwe, uthe yena lokho akuqakathekanga, esithi okuqakathekileyo yikuthi iZanu PF ilungisise izikhalazo zebandla lakhe njalo uMugabe akhulule bonke abathunjiweyo.
Kodwa ingcwethi ecubungula ezombusazwe uMnu Mandlenkosi Gatsheni utshele uNtungamili Nkomo weStudio 7 ukuthi kuqakathekile ukuthi uTsvangirai abuyele eZimbabwe kuyeqalwa njalo inkulumo zokubumba uhulumende womanyano.