Icele leMDC elikhokhelwa nguMnu Morgan Tsvangirai lithi usikomitshi wamapholisa, uMnu Augustine Chihuri kumele atshiye umsebenzi ngoba ewuqhuba ngendlela ephula isisekelo sombuso kanye lemithetho yelizwe.
Isikhulumi salelicele uMnu Nelson Chamisa uthi ukwehluleka kwamapholisa ukukhulula amalunga alo kanye loNkosazana Jestina Mukoko --- kulandela isinqumo seHigh Court esokuthi bakhululwe --- kuveza sobala ukuthi amapholisa kahloniphi imithethwandaba.
Ngalokhu, uChamisa uthi uChihuri kumele atshiye umsebenzi. Kodwa ingcwethi ecubungula ezombusazwe uMnu Brilliant Mhlanga utshele uNtungamili Nkomo weStudio 7 ukuthi inkuthazo yeMDC le kayitsho lutho kuChihuri ngoba sokuyinhlalayenza ukuthi amapholisa ephule imithetho yelizwe kungabindaba zalutho.
