amalinks wokungena

Breaking News

Uzulu WakoBulawayo Lokhe Ehlaba Umkhosi Ngodubo Lwemali


Lamuhla indwendwe zabantu abadinga imali emabhanga zinyamalele lanxa amabhanga ebelayo imali. Kodwa lokhu akutsho ukuthi udubo lokusilela kwemali seluphelile ngoba uzulu usevunyelwa ukuthatha imali kanye ngenyanga.

Ubunzima obuphathelane lokwehlulela ukuthatha imali buqhubekela phambili loba nje lesikuyisikhathi esikhangelelwe ngabanengi ukuthi uzulu enelise ukuqhuba imisebenzi lenhlelo eziphathelane lokulungiselela ukuza komnyaka omutsha.

Lumsakazo ufakaze amabhanga athile ebetha umoya kodwa hatshi ngezizatho zokuswela imali kodwa ngoba inengi labantu selathatha imali elakho ukuthwathwa ngenyanga.

Lokhu kwenzakala loba nje izisebenzi lozulu okhulume le studio 7 bekhala ngokuthi kabala mali ngoba bengenelisi ukuyithatha emabhanga kulandela isinqumo sebhanga lesizwe, ireserve.

Kathesi umuntu sevunyelwa ukuthatha i$10 billion ngenyanga. Kodwa inengi lithi imali kayiphathisi ngoba umnotho welizwe usuwonekele.

Uzulu ongela ncwadi zomsebenzi ezifakaza ukuthi ngempela umuntu uqhatshiwe, ipayslip, uqhubeka ethola i-$500 million kuphela ngeviki yona imbadalo yotshova isiyi $5 billion.

Ukusilela kwemali elizweni kuqhubekela phambili loba nje ibhanga le Reserve Bank lihlezi lisengeza imali elakho ukuthathwa nguzulu emabhanga njalo lidinda imali elesi sindo saphezulu.

Abatholakale bedinga imali batshele i-studio 7 ukuthi inhlelo ezikhangelelwe ukuphathiswa ngemali le zigoqela ukuthenga into zabantwana eziphathelane lesikolo ezifana lempahla zesikolo, ama uniform.

Ezinye Indaba ngesiNdebele...

XS
SM
MD
LG