UMongameli Robert Mugabe ulakho ukukhetha uhulumende womanyano phakathi kweZanu PF lamacele womabili eMDC ekupheleni kuka Nhlolanja, kubika iphephandaba lika hulumenende ele The Herald.
Imbiko le iphuma umanyano weSadc ukhangelelwe ukuqhuba umhlangano wokuhlaziya udaba lweZimbabwe kweleSouth Africa ngeviki elandelayo.
Umanyano weAfrican Union (AU) lawo
ukhangelelwe ukuhlafuna udaba lweZimbabwe emhlanganweni wawo omkhulu
ozaqhutshelwa e Addis Ababa, Ethiopia mhlaka 26 kuyonale inyanga.
Idale lephalamende lalo likhangelelwe ukuqala ukuhlaziya inguquko yesisekelo sombuso uAmmendment # 19 lapho liqala ukuhlala mhlaka 20 kuyonale inyanga.
Kodwa icele leMDC
elikhokhelwa nguMnu Morgan Tsvangirai lona liqina ngokuthi kalisoze lingene kuhulumende
womanyano lo izikhalazo zalo zingalungisiswanga, kutsho umsekeli wesikhulumi
saleli cele unkosazana thabitha khumalo.
Ngakwelinye icele, unobhala jikelele wecele leMDC elikhokhelwa nguMnu Arthur Mutambara, uMnu Welshman Ncube uthi ukubunjwa kukahulumende womanyano kuzagxila ekuthini idale lephalamende liyivumele kumbe hatshi inguquko yesisekelo sombuso.
Kunjalo nje ingcwethi ecubungula ezombusazwe uMnu Mandlankosi Gatsheni utshele uNtungamili Nkomo weStudio 7 ukuthi kubalulekile ukuthi uMongameli Mugabe aqakathekise izikhalazo zeMDC njalo azilungisise kubunjwe uhulumende womanyano ngokuphangisa.
