Inhlanganiso ye World Health Organisation lamuhla yethula umbiko othi inani labantu ababulawa ngumkhuhlane we cholera lokhu liqansa njalo selisedlula inkulungwane elamatshumi ayisikhombisa, 1 732, phakathi kwabantu owabahlaselayo abedlula inkulungwane ezingamatshumi amane, 4306 lokhu waqalisayo ngoNcwabakazi odluleyo.
Uhulumende we Zimbabwe yena ubikwa eqalisile ukwabela izibhedlela imithi, imali kanye lolunye uncedo alutholayo kwamanye amazwe lakunhlanganiso ezizimeleyo, olokulwisana lalumkhuhlane.
Kusenjalo, uMnu. Qhubani Sibanda, isakhamuzi se Harare uthi ukuna kwezulu okusaqhubeka elizweni kwengezelela ingcekeza esedolobheni le Harare ngoba kugcwele izibi ndawana yonke, okungezinye zezatho ezibangela ukumemetheka komkhuhlane lo.
Kusenjalo, uDokotela Joshua Sibanda uthi abantu bengasebenzisa umuthi wokutshenisa impahla ezimhlophe, i jik ukuhlanza amanzi bewanathe ngoba uyabulala igcikwane le cholera njalo awusiwo ngozi ebantwini nxa usetshenziswe ngesilinganiso esifaneleyo.
USibanda uchasisele uSithandekile Mhlanga we studio 7 ukuthi izulu libangela njani ukumemetheka kwalumkhuhlane lokunengi abantu abangakwenza ukuzivikela kuwo.
