Njengokubhidlika kwento yonke elizweni, ezombusazwe, ezenotho, ezempilakahle lokunye okunengi, imfundo layo isiguqe ngamadolo. ingcwethi kwezemfundo zisithi uhulumende weZimbabwe kumele aphangise ukulungisa ezemfundo abantwana benelise ukuya ezikolo ukuze bathole elakusasa elihle.
Nyakenye abantwana laloba befike kubanga lokubhala imihloliso egoqela eye grade seven O le A level bebevele bengafundanga lutho ngoba ababalisi besala ukuya emisebenzini bekhala ngeholo eliphansi. Abanye ababalisi sebaphuma elizweni besiyadinga amadlelo aluhlaza kwamanye amazwe. Inhlanganiso emela ababalisi eye Zimbabwe Teachers association yethule izikhalazo kuhulumende ngokubhidlika kwezemfundo elizweni. Inhlangansio le ibalisa indubeko ezigoqela ukusilela kwababalisi, izinto zokusebenzisa ezikolo, leholo lababalisi eliphansi.
Sikhuluma nje abantwana ababhale imihloliso ye grade seven, O le A level
abalalwazi lokuthi impumela yemihloliso le bazayithola nini. Ugatsha
lwezemfundo soluphinde lwadlulisele phambili ilanga lokuvulwa kwezikolo ngamaviki
amabili. Kuthi abezikolo sebebizela amaschool fees ngemali yakwamanye amazwe
ngasikhathi sinye lababalisi sebefuna ukuhola i US Dollar.
Ukuhlaziya udaba lokubhidlika kwezemfundo elizweni UBrenda Moyo WeStudio 7 uxhume ingcwethi kwezemfundo uMnumzana Dennis Sinyolo ongu Coordinator wenhlanganiso ethiwa Education International, loNkosazana Sibonile Ndlovu isiphathamandla seBulawayo Agenda. UNkosazana Ndlovu uqala ngokuchasisa udaba lwababalisi abehluleke ukuqhuba umsebenzi nyakenye befuna iholo eliphezulu.
