Icele leMDC elikhokhelwa nguMnu Morgan Tsvangirai selikhweze udaba emthethwandaba weHigh Court liphikisa isinqumo esethulwe ngumthethwandaba kamantshi weMutare ngoMvulo esokumisa uNkosazana Lynette Karenyi ukuba ngumeli weChimanimani West edaleni lephalamende.
Lokhu kulandele ukufunyanwa kwakhe elecala lokuloba amabizo abantu abane bengamphanga imvumo, njalo bengavumelananga laye ukuthi bazamsekela ukuthi ancintise kukhetho olwenziwe nyakenye.
Ngalokhu umantshi uBillard Musakwa unqume ukuthi uKarenyi kumele ahlawule ifayindi engange $20 billion, wathi njalo ubemele ahlale entolongweni okwamalanga angamatshumi amabili. Kodwa uthe njengoba ezahlawula ifayindi, kasoze ahlale entolongweni.
UMnu Innocent Gonese ongu chief whip weMDC kaTsvangirai edaleni lephalamende uthi uKarenyi uzaqhubeka engumeli weChimanimani West njengoba sebekhweze loludaba eHigh Court.
Uthi njalo umantshi uphambanisile ngokupha isinqumo lesi ngoba engelalo ilungelo lokumisa uKarenyi ukuba lilunga ledale lephalamende. UMnu Sam Sipepa Nkomo ucgcizelele amazwi ka Gonese esithi isinqumo sikamantshi lesi yimizamo yeZanu PF yokwehlisa inani lamalunga ebandla lakhe kuleli dale.
