Umkhokheli welinye lamacele eMDC uMnu Morgan Tsvangirai, yena obeselenyanga ezimbili ephandle kwellizwe uthi uzaphindela eZimbabwe ngoMgqibelo njalo uthi uzakuba lomhlangano loMongameli Robert Mugabe ngeviki ezayo bekhulumisana ngokuhluphayo kudaba lokubunjwa kukahulumende womanyano.
Ekhuluma lentathelizindaba eJohannesburg ngolweSine, uTsvangirai uveze lokuthi umhlangano lo uzakhokhelwa nguMongameli weSouth Africa njalo engumgcinisihlalo weSadc uMnu Kgalema Motlanthe.
Lanxa
engacacanga ukuthi lumhlangano uzaqhutshwa ngaliphi ilanga, abasiki bebunda bathi ulakho ukwenziwa ngoMvulo. Umkhokheli welinye lamacele eMDC uMnu Arthur Mutambara laye uzaphatheka kulumhlangano.
UTsvangirai uthe ibandla lakhe lilokhu lizimisele ukungena kuhulumende womanyano, kodwa ugcizelele ukuthi bafuna kulungisiswe okuhluphayo kuqala. Wethese njalo uMugabe umlandu wokungazimiseli enkulumeni zokubunjwa kwalo uhulumende.
Kusenjalo ingcwethi ecubungula ezombusazwe uMnu George Mkhwanazi utshele uNtungamili Nkomo weStudio 7 ukuthi, ukuze umhlangano kaTsvangirai loMugabe lo uphumelele, uMotlanthe kakumelanga atshaye inja efihle umphini njengomlamulankunzi uMnu Thabo Mbeki.
