amalinks wokungena

Breaking News

UMungomeli Barack Obama Uba Ngumkhokheli WeMelika Wakuqala Onsundu


Lamhlanje libe lilanga eliqakathekileyo hatshi embalini kazulu weMelika kuphela kodwa lowemhlabeni jikelele lapho kugcotshwa uMongameli wesimatshumi mane lane weMelika onsundu wakuqala. Kulezigidi ezedlula ezimbili zabantu abaze ukuzozibonela lokuzizwela obekusenzakala esidikidikini seWashington DC.

UMnumzana Barack Obama okethwe ukuba nguMongameli weMelika ngenyanya ka November nyakenye ngolweSibili ugcotshiwe ukuba ngumongameli emkhosini owenzelwe eNational Mall e Washington DC. Inengi emhlabeni jikelele lithi leli lilanga elikhulu embalini yomhlaba wonke jikelele. UBrenda Moyo weStudio 7 ukhulume lengcwethi ecubungula ezombusazwe uMnumzana Samukele Hadebe oweUniversity of Zimbabwe othi ukugcotshwa kuka Obama kuyisifundo esikhulu emazweni afana leZimbabwe angela mbuso okhululekileyo.

Eyinye ingcwethi ecubungula ezombusazwe ekhulume loBrenda ngolweSibili nguMnumzana Quiet Ncube othi okwenzakale kweleMelika kuphakamisa lesisizwe njalo uMongameli Robert Mugabe kumele afunde okunengi ngokugcotshwa kuka Obama , alungisise umumo oseZimbabwe.

Kunjalo nje igqwetha elilwela ilungelo loluntu lithi umbuso kaObama ukhangelwe ukukhuthaza amalungelo kazulu emazweni amanengi agoqela eleZimbabwe. UNkosazna Anna Moyo utshele uChris Gande weStudio7 ukuthi ngabe kwangqoba uMnumzana John McCain owebandla lama Republicans ngabe umhlaba ungakhangelelanga okunengi, njengalokhu abantu abakwenze umbuso kaObama.

Ezinye indaba ngesiNdebele...

XS
SM
MD
LG