amalinks wokungena

Breaking News

Kayixotshwe iZimbabwe kuAfrican Union: HRW


Inhlanganiso ekhankasela ukulondolozwa kwelungelo loluntu eye Human Rights Watch (HRW) sikhuthaze ukumiswa kwele Zimbabwe ukuba lilunga leAfrican Union (AU) nxa lingaqhubeka lisephula ilungelo loluntu.

Embikweni ewethule lamuhla, iHRW ikhuthaze njalo ukuthi iAU ithathe amanyathelo aqinileyo emhlanganweni wayo ozaqhutshelwa eAddiss Ababa ngoMvulo ukuze udaba lweZimbabwe lulungisiswe.

Yengeze yathi iAU kumele inikeze uhulumende weZimbabwe isikhathi esithize ukuthi atshiyane lokwephula ilungelo loluntu, isithi nxa lokhu kungenzakalanga phakathi kwaleso sikhathi kumele ixotshe iZimbabwe ukuba lilunga layo.

Umanyano weSadc lawo uhlangana ngoMvulo eSouth Africa ngalanga linye le AU, ngenjongo yokulungisisa udaba lweZimbabwe.

Umkhokheli weMDC, uMnu Morgan Tsvangirai wethule amazwi ngolweSine esithi wethemba lumhlangano uzasithola isisombululo kuqedwe ukudonselana okukhona phakathi kwebandla lakhe leZanu PF phezu kodaba lokwabelana izikhundla zedale leCabinet.

Umhlangano weSadc uqhutshwa kanye kanye lowe AU ngoMvulo, umanyano we European Union (EU) lawo uzahlangana wengezelele izijeziso kuziphathamandla zeZanu PF. Imihlangano yeSadc le AU iza uzulu ekhanya selahlekelwe lithemba lokuthi udaba lweZimbabwe luzakufa lwalungisiswa.

Ingcwethi ecubungula ezombusazwe njalo engumqeqetshi ekolitshini leUniversity of Zimbabwe (UZ) uDokotela Samukele Hadebe utshele uNtungamili Nkomo weStudio 7 ukuthi uvumelana le HRW ekuthini iZimbabwe imiswe ukuba lilunga leAU nxa leli nyathelo lizaletha inguquko elizweni.

Ezinye indaba zeStudio 7...

XS
SM
MD
LG