amalinks wokungena

Breaking News

Kuqhamuka Ukudonselana KuMDC Phezu Kwezinqumo ZeSadc


Umhlangano weSADC oqhutshelwe kwele South Africa ngoMvulo ngenjongo yokulungisisa udaba lweZimbabwe uphele ngolweSibili lumanyano wakhuthaza ukuthi kubunjwe uhulumende womanyano ngokuphangisa, kodwa abeMDC kaMnu Morgan Tsvangirai bazisa ukuthi kabavumelani lesinqumo lesi.

Ngalokhu leli bandla lithi iNational Council yalo izahlangana ngolweSine itsho ukuthi liyangena kuhulumende womanyano kumbe hatshi.

Umgcinisihlalo walumnayano uKgalema Motlanthe wazise ukuthi abeZanu PF labe MDC bavumelene ukungena kuhulumende womanyano lo, esithi idale lephalamende lizamele lipase uAmmendment # 19 ukuthi abe ngumthetho mhlaka 5 Nhlolanja. Lumthetho ucanda indlela yokubunjwa kukahulumende phakathi kwamabandla la.

UMnu Morgan Tsvangirai yena kuzamele afungiswe kanye labasekeli bakhe mhlaka 11 Nhlolanja kuthi abaphathintambo kanje labasekeli babo kuzamele bafungiswe labo ukuqala umsebenzi mhlaka 13 Nhlolanja.

Silokhu sikudaba lunye, abazi ngokwenzakalayo batshele lumsakazo ukuthi uMongameli Mugabe, uMnu Morgan Tsvangirai kanye loMnu Welshman Ncube, yena obemele uMnu Arthur Mutambara kunkulumo zayizolo, bavumelene ukuthi bangene kuhulumende womanyano ngemva kokuba uMugabe ethembise ukuthi uzimisele ukulungisisa izikhalazo zikaTsvangirai.

Abathathu laba bavumelene njalo ukuthi amaqula abo azahlangana lamuhla eqale ukukhulumisana ngokuthi izikhundla zabosibalukhulu zizakwabiwa njani kanye lezabameli beZimbabwe kwamanye amazwe. Kodwa iqula leZanu PF libikwa licele ukuthi lumhlangano udluliselwe phambili ngoba bekumele liphindele loMongameli Mugabe eZimbabwe ngolweSibili.

Umhlangano lo ubumele uqhutshelwe eSouth Africa. Ngalokhu, usuzaqhutshelwa eZimbabwe kunsukwana ezizayo. UTsvangirai yena ubikwa efike wazisa ke iqula lakhe ukuthi sebevumelene loMugabe, kodwa iziphathamandla zebandla lakhe zathi ngitsho akwenziwa lokho okwenze kwaba lokufuthelana okukhulu phakathi kukaTsvangirai leziphathamandla zebandla lakhe.

Ukungena kumbe ukungangeni kwecele lakhe kuhulumende womanyano lo sokusezandleni zeNational Council yaleli bandla yona ezahlangana ngolweSihlanu eHarare, kutsho isikhulumi salelicele uMnu Nelson Chamisa.

UMongameli Mugabe yena utshele intathelizindaba efika eHarare ukuthi ibandla lakhe selikhangelele ukuthi kubunjwe uhulumende omutsha lo njengoba sebevumelene. Ingcwethi ecubungula ezombusazwe uMnu George Mkhwanazi uthi njenge mvama iSadc iphethe uMongameli Mugabe ngezandla ezibuthakathaka emhlanganweni wayizolo.

Ezinye indaba zeStudio 7...


XS
SM
MD
LG