Idale lecabinet kuhulumende omutsha lihlangene okwakuqala namhla eHarare emhlanganweni obukhokhelwa ngumongameli Robert Mugabe.Ngemva kwalumhlangano uMugabe lenhloko kahulumende uMnumzana Morgan Tsvangirai babe lowabo umhlangano.
Isikhulumi sika Tsvangirai, uMnumzana James Maridadi utshele iStudio 7 ukuthi ababili laba bebekhangela ukuthi utsvangirai kuyini asekwenzile selokhe wathatha isikhundla kuviki edluleyo. Bakhulume njalo ngodaba lokuthi abantu beZimbabwe kumele bakhulume abakufisayo kungela kwesabela ukubotshwa lokuhlukuluzwa. Bakhuluma njalo ngokuthi kumele kukhululwe ezemibiko elizweni, lokunye.
UTsvangirai uphinde wahlangana labaphathintambo bengatsha ezigoqela olubona ngobudlelwano lamanye amazwe,olubona ngezemfundo,olubona ngezaphakathi kwelizwe, lolwezomvikela. Kusasa uMugabe loTsvangirai bakhangelelwe ukuhlangana njalo bekhuluma ngodaba lwama ministers of state, amadeputy ministers lama governors.
Ukuhlaziya ukuthi njengoba uhulumende womanyano eseqalile ukusebenza, ulakho ukuphumelela na istudio 7 ikhulume lengcwethi ecubungula ezombusazwe uMnumzana Jethro Mpofu ofundisa izifundo zokwethulwa kwemibiko eZimbabwe Open University, othi uzulu weZimbabwe ulethemba kuhulumende lo.
Kunjalo nje inhlanganiso zababalisi ezigoqela iProgressive Teachers Union of Zimbabwe PTUZ le Zimbabwe Teachers Association zihlangane lenhloko kakhulumende uTsvangirai labasekeli bakhe uNkosazana Thokozani Khuphe loMnumzana Arthur Mutambara izolo bekhuluma ngodaba lwezemfundo elizweni. Inhlanganiso lezi bezibalisa okuhluphayo okwenze ababalisi bakhalale umsebenzi, ikakhulu udaba lweholo.
Namhlanje uTsvangirai ubelomhlangano lomphathintambo obona ngezemfundo uMnumzana David Coltart behlaziya izikhalazo ebezibekwe phansi zinhlanganiso zababalisi izolo. IStudio 7 yamukele umbiko wokuthi ngemva komhlangano kaTsvangirai loColtart inhlanganiso zababalisi zihle zabizwa emhlanganweni ngolweSithathu.
UBrenda Moyo weSstudio 7 ukhulume lomnumzana richard gundani unobhala jikelele we ZIMTA ochasisa okukhulunywe emhlanganweni wayizolo, labakukhangeleleyo
