Abaphathintambo ababona ngezemali emazweni eSadc abaqale umhlangano wabo kwele South Africa ngolweSithathu bekhulumisana ngodaba lokuphathisa uhulumende weZimbabwe ngemali bagqibe umhlangano wabo ngolweSihlanu bakhuthaza ukuthi inkokheli yamazwe eSadc ibize umhlangano wesiphangiphangi babumbe isikhwana sokuphathisa ukuvuselela eleZimbabwe.
Uhulumende uthi ufuna imali engange US$2 billion eyokuvuselela ilizwe. Ekupheleni komhlangano lo obona ngezangaphandle kwelizwe eSouth Africa uNkosazana Dlamimni Zuma wazise ukuthi iziphathamandla zamazwe eSadc zivumelene ukuthi zizaphathisa izimbabwe ngemali eyidingayo.
Kodwa uthi ngokonakala kwezenotho
emhlabeni jikelele, kalaqiniso lokuthi bazakwenelisa yini ukuyibuthanisa yenele imali
efunwa yiZimbabwe. Lamhlanje siqhubekela phambili ngengxoxo yethu esilethulele
yona ngolweSine phakathi kwengcwethi ezicubungula ezombusazwe uMnu Mandlenkosi Gatsheni loMnu Immanuel hlabangana sihlaziya udaba loncedo oludingwa yiZimbabwe.
Bobabili bathi ukuze uhulumende womanyano lo abe lesithunzi kumele eqakathekise ilungelo likazulu njalo ethonise bonke abalamacala, kanye lalabo ababekubutho likaMongameli Robert Mugabe eleFive Brigade ngesikhathi seGukurahundi lona elangeela abantu beMatabeleland labeNkabazwe labulala abedlula i 20 000.
