Inhlanganiso eziphathisa ngoncedo elizweni ezigoqela o Red Cross, Care International,UNICEF, WHO lezinye zithi zesabela ukuqhamuka komkhuhlane wecholera ngesikhathi sokuna kwezulu, esesisondele.
Inhlanganiso lezi zithi ziphakathi kokuqhuba inhlelo zokuzama ukuvimba ukuqhamuka kutsha kwecholera laloba sokulemibiko yokuthi kulabantu abahlanu asebebulewe yiwo, lokuthi umkhuhlane lo usuvumbulukile njalo ezigabeni ze Manicaland, Mashonaland west, Midlands leMasvingo lapho okubikwa sokutholakale abantu abedlula ikhulu 117 asebehlaselwe yiwo.
ICare International ithi ilohlelo lokutholisa abantu amanzi ahlanzekileyo esigabeni seMasvingo leMwenezi ngoncedo lwemali evela kunhlanganiso ye European Union. I UNICEF layo ithi ilohlelo lokupha abantu amaphilisi okuhlambulula amanzi.
Udokotela Joshua Sibanda isizalwane seZimbabwe osebenzela kwele South Africa utshele uBrenda Moyo weStudio 7 ukuthi ukubhidlika kwezempilakahle elizweni akuphazamisi kangako ukuvikelwa komkhuhlane wecholera, esithi icholera ilula ukuyelapha.
