amalinks wokungena

Breaking News

UMnu Tsvangirai Uhlangana Lomgcinisihlalo WeSadc


Umkhokheli welinye lamacele eMDC, uMnu Morgan Tsvangirai ngoLwesine uqhubekele phambili ngohambo lwakhe lokukhulumisana lenkokheli yamazwe angezansi yezwekazi leAfrica mayelana ngokuhluphayo kweleZimbabwe ngokuhlangana lomgcinisihlalo weSadc njalo nguMongameli weDRC uMnu Joseph Kabila.

UTsvangirai ukhulumisane loMnu Kabila eKinshasa emcela ukuthi akhuthaze amanye amalunga eSadc ukuthi angenele ngokuphangisa kulungisiswe okuhluphayo kuhulumende womanyano.

NgoLwesithathu uTsvangirai ubeseSouth Africa lapho akhulumisane khona loMongameli Jacob Zuma njalo ngoLwesibili ubese Mozambique yona engumgcinisihlalo weSadc Troika.

IMDC kaTsvangirai iphume nganxanye kuhulumende womanyano ngeviki edluleyo isithi ifuna kulungisiswe konke okulokhu kuhlupha kuhulumende womanyano okufana lodaba lukaMnu Gideon Gono loMnu Johannes Tomana.

NgoLwesihlanu uTsvangirai ukhangelelwe ukuya kweleAngola ukuyakhulumisana loMongameli walelo lizwe mayelana ngokuhluphayo eZimbabwe.

Umphathintambo obona ngokwenzakala emawofisini kaTsvangirai, uMnu Gorden Moyo uthe ibandla lakhe lifuna umanyano weSadc ungenele ngokuphangisa kulungisiswe okuhluphayo kuhulumende.

Ingcwethi ecubungula ezombusazwe, uMnu Mandlenkosi Gatsheni utshele uNtungamili Nkomo weStudio 7 ukuthi kubalulekile ukuthi udaba lweZimbabwe lulungisiswe ukuze kwenqatshelwe ukubhidlika kukahulumende womanyano lo.


Ezinye indaba zeStudio 7...

‚Äč
XS
SM
MD
LG