UMongameli Robert Mugabe ubikwa esegcizelele njalo, ukuthi icele le MDC elikhokhelwa nguMnu. Morgan Tsvangirai lifuna ukuphuma kuhulumende womanyano ngoba lisola ukubotshwa lokuthonisiswa kwesiphathamandla salo, uSenator. Roy Bennett, okutshengisa sobala ukuthi lisetshenziswa ngabamhlophe.
UMugabe ubekhuluma labasekeli bakhe emhlanganweni obuse Zhombe e Midlands, njalo ukhonone ngokuthi lelicele libuyisela ilizwe emuva ngokulalela kanye lokwenza elikutshelwa ngamazwe aphetsheya.
Ungezelele wathi uhulumende womanyano wabunjelwa ukuthi amabandla ezombusazwe ancedisane kuhlelo lokulotshwa kwesisekelo esitsha sombuso, esizalandulela ukhetho, kungakapheli iminyaka emibili.
USithandekile Mhlanga we studio 7 uxoxe lo Mnu. Alois Dzvairo, isiphathamandla se National constitutional Assembly, ukuze sizwe imbono yakhe ngamazwi kaMugabe la.
