Abamabandla ezombusazwe ancintisayo kukhetho oluzayo bebegchwele ndawana yonke liviki bedinga usekelo lokhetho osolusalelwe yiviki nje ukuthi lwenziwe.
Lamuhla khona amacele womabili eMDC leZanu PF abelemihlangano endaweni ezinengi zelizwe laloba kulilanga lakuqala lekhefu lephasika. UMnu Morgan Tsvangirai okhokhela elinye lalawa macele ubelomhlangano eMakoni West leRusape kwathi amanye amalunga ebandla lakhe lawo ebesabelele endaweni ezitshiyeneyo zelizwe.
I MDC ekhokhelwa nguMnu Arthur Mutambara yona layo ibelemihlangano koBulawayo lemaphandleni endaweni ezitshiyeneyo. UMnu Simba Makoni, oncintisa elilunga elizimeleyo ubikwa ebe lomhlangano eMarondera.
I Zanu PF layo ibelemihlangano endaweni ezitshiyeneyo. Umkhokheli walelibandla, umongameli Robert Mugabe ubeseGweru lapho agchobe khona ekade bephothula izifundo zebutho. Esuka lapho uMugabe ubikwa elubhekise eMurombedzi lapho aphe khona izakhamizi inqola lamakhuba, wazikhuthaza ukuthi zivotele ibandla lakhe.
Kungasensuku zatshwala nje ukuthi ukhetho luqhutshwe, unobhala jikelele webandla leMDC ekhokhelwa nguMnu Mutambara utshele intatheli yeStudio 7 uNtungamili Nkomo ukuthi ibandla lakhe selisenza imihlangano yokucina njalo selimelele lolu khetho.