Inkulumo zokulungisisa umumo oseZimbabwe phakathi kwebandla leZanu PF lamacele womabili eMDC zigqitshwe lamuhla kweleSouth Africa.
Abazi ngokwenzakalayo bathi amaqula amabandla womathathu aphindele eZimbabwe lamuhla ngemva kokuvumelana ugwalo lwezimiso zokuthi uhulumende omutsha kumele ame njani, njalo kwabelwane amandla njani.
Bekhuluma ngudlu lalumsakazo abazi kuhle ngokwenzakalayo, baveze ukuthi amaqula la azakwazisa inkokheli yawo ngosokuvunyelenwe kusasa. Ngempelaviki uMongameli Robert Mugabe, uMnu Morgan Tsvangirai loMnu Arthur Mutambara bazahlangana eHarare behluza okubotshwe ngamaqula abo.
Amathuba okuthi bobathathu bavumelane ngalokho okuphume kunkulumo, abikwa emanengi njalo ethembisa. Kodwa nxa belokukhonona, amaqula abo azabuyela njalo kweleSouth Africa ayelungisisa khonokho okuyabe kuhlupha. Ukudingisisa okwenziwe yiStudio 7 kuveze ukuthi imibiko yokuthi uMongameli Mugabe uzakuba nguMongameli welizwe ongelamandla- uceremonial President ayisilo qiniso.
Bekulihungahunga elingasiqiniso njalo lokuthi uMugabe loTsvangirai bekumele behlangane lamuhla eHarare. IStudio 7 ifumene njalo ukuthi kayila qiniso imibiko yokuthi iziphathamandla zebutho zike zaba lomhlangano leziphathamandla zikahulumende weleSouth Africa ebeziqhuba inkulumo lezi.
Iqiniso yikuthi abantu okuthiwa yiziphathamandla zebutho, yiziphathamandla zeZanu PF ezinhlanu ezibalisa oMnu John Nkomo, uSidney Skeramayi, Stan Mudenge, Emmerson Mnangagwa loNkosikazi Oppah Muchinguri abathunye kweleSouth Africa ngoLwesibili ukuyancedisana loMnu Patrick Chinamasa loMnu Nicholas Goche ekade bemela iZanu PF kunkulumo.
Abasiki bebunda bathi,
uMutambara, uTsvangirai loMugabe bengakuvuma osokubotshwe ngamaqula abo,
uhulumende omutsha uzaqoqwa ngokuphangisa aqale ukusebenza ngeviki ezayo. Idale
lephalamende lalo lizahle livulwe ngeviki ezayo. Isithunywa seUnited Nations eZimbabwe uMnu Haile Menkerios, obemele ethekelele iZimbabwe ubikwa evinjwe nguhulumende ngoba esithi uza ngenjongo engalunganga ethunywe yizitha.
Udaba oluke lwahlupha ngolokwabelana amandla phakathi kukaTsvangirai loMugabe, kodwa solulungisisiwe. Imizamo yokuqhwanda ukuze sithole ukuthi kambe bobalili laba kungaba kuvunyelwane ukuthi babelane njani amandla yehlule, kodwa okusobala yikuthi uMugabe uzaqhubeka enguMongameli welizwe olamandla.
Ingcwethi ecubungula ezombusazwe uMnu Mlamuli Nkomo utshele uNtungamili Nkomo weStudio 7 ukuthi yinto ejabulisayo ukuthi inkulumo lezi seziphethiwe, njalo uthi ulethemba uMugabe, uTsvangirai loMutambara bazakuvuma okuhlelwe ngamaqula abo, udaba lweZimbabwe lulungisiswe.
