Inhlanganiso elwela amalungelo ababalisi abafundisa emaphandleni eyeAmalgamated Rural Teachers Union of Zimbabwe (ARTUZ) ithi amalunga ayo awalugxobi emsebenzini kusukela ngoMvulo uhulumende aze ebengezelele iholo. Inhlanganiso le ilobele uhulumende incwadi ngeviki edluleyo, imazisa ngokuthi izakhalala umsebenzi, njalo ithi ukutshengisela lokhu kusemthethweni.
Lokhu kwenzakala odokotela labo bephakathi kokukhalala umsebenzi ngesizathu esifanayo njalo besithi ababuyeli emsebenzini ngoMvulo njengokutsho komthethwandaba obona ngeziphathelane lezisebenzi owe labour court, kukanti balungiselela ukuphikisa lesi isinqumo emthethwandaba weSupreme Court.
Abongi labo bathi bazaxhasa odokotela kulokhu ukutshengisela.
Uhulumende ubikwa esithi uzahlolisisa ukuba odokotela bayabuyela na emsebenzini ngoMvulo andubana athathe inyathelo.
Ukuzwa okunengi ngokutshengisela kwababalisi, sixoxa lomgcinisihlalo weMatabeleland North kunhlanganiso yeARTUZ uNkosazana Sukoluhle Ndlovu, yena oqala ngokuchasisa ukuthi imali abayiholayo ayeneli ukuthenga impahla ezimqoka kumbe ukugada amabhasi. Uthi kuqakathekile ukuthi abanye ababalisi abangekho kunhlanganiso yabo bexhasane labo kulokhu ukutshengisela.
UMnu. Joseph Tshuma, isiphathamandla sebandla leZANU PF njalo engusomabhizimusi uthi ukukhuphuka kwentengo mahlayana ezitolo kwenziwa ngabomu ngabafuna ukuzinothisa masinyane.