Ababalisi abafundisa emaphandleni abaphakathi kokutshengisela ngokuhamba besuka edolobheni leMutare besiya eHarare, ngendlela yokubamba uhulumende ngamandla ukuthi abaholise ngemali yakwamanye amazwe bathi umkhankaso wabo uqhubeka kuhle njalo bakhangelele ukufika esigodlweni ngeviki ezayo.
Inhlanganiso elwela amalungelo ababalisi abafundisa emaphandleni eye Amalgamated Teachers Union of Zimbabwe eyiyo eqoqe lokhu ukutshengisela ithi ababalisi laba bazafika behlale phandle kwamahofisi kamphathintambo obona ngezemali uMnu. Mthuli Ncube, aze alalele izikhalazo zabo.
Lokhu kwenzakala odokotela abasebenza ezibhedlela zikahulumende labo bekhalele umsebenzi.
Sixoxe loMnu. Never Nyahunzvi, isiphathamandla senhlanganiso yePTUZ eMatabeleland North, yena othi inhlanganiso yakhe ilokhu ilindele impendulo evela kuhulumende ngoba yamazisa ukuthi ababalisi abaphansi kwalumanyano bazakhalala umsebenzi izikolo zivulwa ngoZibandlela nxa izikhalazo zabo zingafezwanga.
