Ababalisi bathi ukukhalala kwabo umsebenzi kuya phambili lanxa uhulumende esithi usebambanise iholo labo lamaAllowances aweCovid-19 ukuze imali le bayithole ibambene njalo ithe xaxa.
Uhulumende wazise izolo ukuthi amaUS$75 awaholisa izisebenzi zakhe njengamaAllowances aqondane lokuzivikela kumkhuhlane weCovid-19 asezabanjaniswa leholo kodwa izabhadalwa ngemali yeZimbabwe.
Uthe lokhu kutsho ukuthi iholo likambalisi seliyiZ$12,591.15.
Kodwa ababalisi bathi le yiyo imali abavele beyithola nxa kuhlanganiswa iCovid-19 Allowance leholo labo.
Ngokunjalo, bathi akulamali abayengezelelweyo. Bathi bafuna iholo labo likhutshulwe lilingane leUS$520 kungabalwa iCovid-19 Allowance.
Isiphathamandla senhlanganiso yeProgressive Teachers Union of Zimbabwe (PTUZ) uNkosikazi Nokuthula Hlabangana utshele umsakazo weStudio 7 ukuthi ababalisi babambene ekuthini baqhubeke ngokukhalala umsebenzi.
Kusenjalo, intengo yokudla lokunye okutshiyeneyo ezitolo ibikwa isilamaviki ingakhuphuki lanxa nje ivele iphezulu ingafinyelelwa ngabanengi.
Ingcwethi zithi lokhu kubangelwa ngumkambo wemali osemthethweni okhanya usubulele umkambo wensitha.
Usomabhizimusi wakoBulawayo, uMnu Edwin Ndlovu, olilunga lebandla leMDC Alliance uthi okungaphathisa umnotho welizwe yikuthi kusetshenziswe idola leMelika kuphela eleZimbabwe lifakwe eceleni.
Facebook Forum