amalinks wokungena

Breaking News

Abadlali Beqembu Lama Warriors Batholakale Bele Covid– 19 Bephenduka kuKhisimusi


The Zimbabwe Warriors

Kulabadlali abayithoba munwe munye phakathi kwabangamatshumi amabili lantathu ababumba iqembu elimela ilizwe emdlalweni wenguqu elamaWarriors, asebetholakale bele Covid – 19.

Abadlali laba bayingxenye yeqembu eliphakathi kwamalungiselelo awokuyaphatheka kuncintiswano we African Nations Championships ozaqhutshelwa elizweni leCameroon ngomnyaka ozayo.

Isikhulumeli senhlanganiso ye Zimbabwe Football Association, iZIFA, uXolisani Gwesela uthi abadlali bahlolwe ekuphendukeni kwabo bevela kukhefu lekhisimusi.

“Sasibakhululile ukuba baye kukhisimusi njalo ekuphendukeni kwabo sibahlolile kwatholakala ukuba abayithoba munwe munye balomkhuhlane we Covid – 19. Silandele iziqondiso zabe World Health Organisation ukuthi bahlaliswe bodwa bengahlangani labanye njalo baphinde bazise imuli, izihlobo, abangane kanye labanye abantu abangabe beke baba labo ukuba sebetholakale belomkhuhlane. Uhulumende simazisile kanye lababona ngezempilakahle kumasipala yedolobho le Harare, labe Confederation of African Football labo sibatshelile ukuba yilo udubo esesihlangane lalo lolu,” kutsho uGwesela.

Intathelizindaba yezemidlalo uFortune Mbele uthi yena iphutha elenziwe zinkokheli zomdlalo wenguqu kwele Zimbabwe yikungalandeli inkuthazo eyokuba abadlali bengahlangani labanye abantu abangelani leqembu, i bio bubble concept ngesilungu.

“Abadlali kumele ngabe bahlala bevikelekile ngasosonke isikhathi manje iqembu lama Warriors belidlala imidlalo eyokuzwana amandla lamaqembu alabadlali abakade besuka ngakibo. Lokhu kungabe kufake abadlali engozini eyokubanjwa ngumkhuhlane njalo kathesi kunzima ukuba kwazi ukuba isifo sivele ngaphi,” kutsho uMbele.

Inkokheli yeqembu leZimbabwe Warriors ibize abadlali abangamatshumi amabili lantathu ukuba kube yibo abaphenduka enkambeni bezoqhubekela phambili ngamalungiselelo okuyadlala kumidlalo ye Chan.

Abadlali laba ngababalisa onozinti uAriel Sibanda, uSimbarashe Chinani kanye lo Nelson Chadya. Imvimbi nguPeter Muduhwa, uPartson Jaure, uTafadzwa Jaravani, uIan Nekati, uQadr Amini, uCarlos Mavhurume, uPawell Govere, kanye lo Andrew Mbeba.

Abadlali benkabeni yenkundla kulo Talent Chamboko, uRichard Hachiro, uRonald Chitiyo, uGabriel Nyahwa, uWellington Taderera, uLeeroy Mavunga, uTatenda Tavengwa, uKind Nadolo kanye lo Denver Mukamba.

Abagadli kulo Tawanda Nyamandwe, uObriel Chirinda kanye lo Farawo Matare.

please wait

No media source currently available

0:00 0:02:22 0:00

Facebook Forum

XS
SM
MD
LG