amalinks wokungena

Breaking News

Abadlali Beqembu LamaWarriors Lokhe Bemelele Imbadalo Yemidlalo yeChan


Zimbabwe Warriors
Zimbabwe Warriors
Abadlali beqembu lesizwe elama Warriors balokhu belinde ingxenye yabo eyemali etholwe yileliqembu lize liphutshe imidlalo yalo lisesibangeni sesine kumncintiswano we Chan oqhutshelwe kwele South Africa ekuqaleni komnyaka.

Iqembu le Zimbabwe lithole inkulungwane ezingamakhulu amabili lamatshumi amahlanu zamadollar-$250 000) ngokwenelisa kwalo ukufinyelela kusigaba se semi-final emncintiswaneni we African Nations Championships oqhutshelwe elizweni le South Africa ngenyanga kaZibandlela.

Limali ilokhu ingakafinyeleli ezandleni zabadlali kanye labaqeqetshi beqembu lesizwe abaphatheka kulumncintiswano loba nje kulamahungahunga athi inhlanganiso ye Caf seyayipha inhlanganiso ebona ngokuqhutshwa komdlalo wenguqu elizweni eye Zifa.

Omunye umdlali weqembu lesizwe okhulume lalumsakazo yena ongathandanga ukubethwa ngegama uthi kube kuhle ngoba umkhokheli weZifa uCuthbert Dube ebuyele esikhundleni ngoba bona njengabadlali bebesesabela ukuba engadliwa iziphathamandla ezisebenza ngaphansi kwakhe bezizahamba lalimali bona besale bephethe umoya.

Inhlanganiso yeZifa ibhekane lezikwelede ezedlula izigidi ezinhlanu njalo abadlali beqembu lesizwe bake bakhalala ukuzilolonga bekhonale emncintiswaneni weChan bekhonona ngokungatholi imfanelo zabo ikanti leqembu labesifazane elimela ilizwe emdlalweni wenguqu like ladla ingqweqwe zomlomo lesendaweni ye Zifa Village ngemva komdlalo walo lele Botswana kungela mali yokuba abadlali bebuyiselwe emakhaya.
………………………………………………………………………………………………………………………………………………………………………………………………………………………………
Sikhangele umdlalo we rugby;
Iqembu elimela isizwe kuhlobo lwe rugby edlalwa ngabadlali beyisikhombisa elaziwa ngokuthi ngama Cheetahs (amahlosi ngesintu) lehlulekile kumizamo yalo eyokuba yingxenye yamaqembu akuzinga laphezulu kulumdlalo ngemva kokunqotshwa ngele Italy kusigaba sokucina esomncintiswano oqhutshelwe e Hong Kong.

IZimbabwe ibiqale kuhle kakhulu ngokunqoba amazwe athi i Barbados, iChile kanye le Russia emidlalweni yezibaya kodwa yasikhulelwa yi Italy nge 17 ka 12 kusigaba esilandele lapho.

Aluba iphumelele iZimbabwe ibizathola ilungelo lokuphatheka kuyo yonke imincintiswano ye IRB Rugby Sevens ebakhona emazweni atshiyeneyo.
XS
SM
MD
LG