Owayengumdlali weqembu lesizwe uEdward Sadomba ukhuthaza abadlali bomdlalo wenguqu ukuba balungiselele ikusasa yabo sebethethe umhlalaphansi.
USadomba uthi umsebenzi owokudlala ezemidlalo uyaphangisa ukuphela yikho kuqakathekile ukuba abadlali belungiselele ikusasa yabo ukuze bethole ukuziphilisa kanye lemuli zabo nxa sebethe bathatha umhlalaphansi.
“Ngenxa yolwazi esengilalo empilweni lasemdlalweni wenguqu, ngikhuthaza abanye ukuba indlela enhle eyokugcina imali yikuba lezakhiwo, ama property ngesilungu.
Kuhle njalo ukuba lezakhiwo lezi elizweni lakini ngoba kuyilapho okulemuli yakho khona njalo zizaphathisa ngitsho lezizukulwane zakho,” kutsho uSadomba.
USadomba udlale kakhulu emazweni abalisa ele Sudan, eLibya kanye le United Arab Emirates njalo uke walobelana isivumelwano somsebenzi esesigidi samadola aseMelika ngesikhathi ethengwa liqembu le Al Ahli Tripoli elase Libya ngomnyaka ka 2014.
Kuvamile ukuba abadlali bomdlalo wenguqu bedonse kanzima ikakhulu nxa sebethethe umhlalaphansi kwele Zimbabwe imbangela kuyikuba inengi labo livele liyabe lithola iholo elincane.
USadomba uthi labo abazithola sebedlala phetsheya lapho okuleholo elingcono kumele bengadlalisi imali njalo ukuthenga loba ukwakha izindlu lezinye izakhiwo kungabanceda kakhulu.
Abanye abadlali bathi bangathatha umhlalaphansi ekudlaleni babe ngabaqeqetshi kodwa lowo ngumsebenzi ongela kusasa elicacileyo ngoba besuka babe banengi abaqeqetshi abaxotsha imisebenzi emilutshwana.