Abake basebenzela amahotela edolobho leVictoria Falls abamiswa umsebenzi ngenxa yokuqhamuka kweCovid-19 baphiwa imali eyingcosana nje kuphela njengempentsheni bathi bazaqhubeka belwisa ababengabaqhatshi babo ukuze baphiwe imali engcono.
Uhulumende uthi ufuna ukuvuselela imisebenzi yokwethekelelwa kwelizwe.
Ngalokho, ugatsha lwezempilakahle lwaqala uhlelo lokuhlaba abantu ijekiseni ye-coronavirus kulelodolobho njalo yilo elibikwa lilabantu abanengi asebehlatshiwe.
Kodwa labo ababesebenza kulelidolobho bathi kuyamangalisa ukuthi uhulumende ukhuluma ngokuvuselelwa ezokwethekelwa kwelizwe bona bemiswa imisebenzi.
Abanye bathi basebenzela amahotela okweminyaka edlula engamatshumi amane kodwa bathe bemiswa umsebenzi baphiwa imali engamadola angamakhulu amahlanu, $500, kuphela.
Bakhweza udaba lwabo emthethwandaba nyakenye kodwa lwalahlelwa khatshana ngenyanga edluleyo.
Omunye wabantu laba uMnu Edson Moyo utshele iStudio 7 ukuthi bazakhweza udaba lolu enkantolo ephatha indaba zezisebenzi eyeLabour Court njalo uthe abasoze bakhathale.
