Uhlangothi lwenhlanganiso yabalwa impi yenkululeko eye Zimbabwe National Liberation War Veterans Association olukhokhelwa nguRetired Colonel Basten Beta luthi inotho ye lizwe yabhidlizwa nguMongameli Robert Mugabe labanye bakhe abakubandla le Zanu PF hatshi izijeziso zenotho ezafakelwa ezinye iziphathamandla zaleli bandla.
Osewatshiya umsebenzi wokuba kubutho, uRetired Colonel Beta lenhlanganiso yakhe esanda kuhlamukela iWar Veterans Associaton ekhokhelwa nguMnu. Joseph Chinotimba babikwa besithi ubugovu, ubusela, ukuswelakala kwenkhokheli kanye lenkethabetshabi egxile kunkokheli ye Zanu PF yikho okwabulala iZimbabwe.
Inhlanganiso le ebikwa ifaka imbiko eminenginengi kumaphephandaba azimele wodwa ithi ngamanga ukuthi inotho yabhidlizwa yizijeziso ezafakelwa abanye abalandeli bebandla le Zanu PF njengalokhu okukhulunywa nguMongameli Mugabe labalandeli bakhe.
Linhlanganiso iphinde yathi uMugabe lalabo abaseduzane laye abadla ngoluphakathi kade besenza santando kubhanga elikhulu lelizwe iReserve Bank of Zimbabwe kanye lamankampani kahulumende kungakabunjwa uhulumende womanyano okwenze ukuthi banothe okwesabekayo.
Linhlanganiso ithi njalo kumele uMongameli Mugabe labanye bakhe basuke ezikhundleni ukwenzala ukuthuthukisa inotho yelizwe.
Umnu. Nkululeko Sibanda ingcwethi ecubungula ezenotho utshele uGibbs Dube we Studio 7 ukuthi kuliqiniso ukuthi uMongameli Mugabe labanye bakhe babulala ilizwe loba nje lezijeziso lazo zancedisa ukubhidliza iZimbabwe.
Elinye Icele Labenhlanganiso Yabalwa Impi yeNkululeko Lithi uMugabe Labanye Bakhe Babulala Ilizwe
- Gibbs Dube
