amalinks wokungena

Breaking News

Abakalahli Ithemba Abeqembu Lomdlalo Wenguqu eleTalen Vision


Iqembu leTalen Vision

Iqembu le Talen Vision linqobe ele Bosso 90 nge 3 ka nya ngoLwesihlanu emini emdlalweni oqhutshelwe enkundleni ye Crescent okuyimpumela elitshiye lilokhu litshiywa ngemiklomelo emithathu liqembu elihlezi phezu kwengalane ele Bulawayo City lona elibhaxabule ele Binga Pirates nge 7 ka nya emdlalweni oqhutshelwe enkundleni ye Luveve.

Isimo sengalane ngemva kwemidlalo yangoLwesihlanu sitshengisa ukuba iqembu le Bulawayo City selilemiklomelo engamatshumi ayisithupha lowodwa (61) kuthi ele Talen Vision lilemiklomelo engamatshumi amahlanu lathoba minwe mbili (58).

Iqembu le Talen Vision lihlale okwesikhathi eside lisesiqongweni sengalane yemiklomelo kodwa laselithathelwa lesisikhundla ngemva kokunqotshwa ngele Indlovu Iyanyathela ngoLwesihlanu olwedluleyo.

Loba kunjalo umlandeli waleliqembu uSabelo Masuku uthi yena bazaqeda imidlalo yalonyaka behlezi phezu kwengalane.

“Uhambo lusasekhona. Kumidlalo yonale eseleyo sizabona okokwenza. Isingadliwa layo iBCC kuthi thina sinqobe kuyo yonke,” kutsho uMasuku.

Iqembu le Talen Vision lizadlala lamaqembu abalisa ele Casmyn kanye lele Makomo kumidlalo emibili elisele layo kuthi iqembu le Bulawayo City lizadlala lele Mosi Rovers kanye lele Arenel Movers.

Imidlalo yenguqu kusigaba se Castle Lager Premier Soccer League ingena kuviki yamatshumi amabili lathoba munwe munye kulimpelaviki njalo ngeSonto kulomdlalo omkhulu phakathi kwamaqembu amakhulu elizweni athi ele Dynamos kanye lele Highlanders.

Lumdlalo uzaqhutshelwa enkundleni ye Rufaro njalo uza ngesikhathi iqembu le Highlanders litshaya eziwayo selokhu kwafika umqeqetshi oyisizalwane selizwe lase Netherlands uHendrik Pieter de Jong.

Ekhuluma lentathelizindaba zemidlalo ekupheleni komdlalo weqembu lakhe lele Yadah ngoLwesine, lumqeqetshi uthe ukhangelele ukuba lumdlalo ube ngumdlalo wezinga laphezulu.

“Akusoze kube lula ngoba iqembu le Dynamos selidlale imidlalo eminengi lisiba ngutshiki lobhanqa linganqobi. Thina kithi konke kuhamba kuhle njalo sizaqhubekela phambili sizama ukuba siyale silokhu sikhuphuka engalaneni yemiklomelo njalo likhumbule ukuba elinye ilihlo livele likhangele inkezo leyi esingene khona kusigaba se semi – final,” kutsho uDe Jongh.

Eminye imidlalo yesigaba se Castle Lager Premier Soccer League izadlalwa ngokulandelayo.

Kusasa ngoMgqibelo iqembu le Ngezi Platinum Stars lizemukela ele Manica Diamonds enkundleni ye Baobab, iqembu le FC Platinum lizadlala lele Bulawayo Chiefs ngase Mandava, iqembu le Herentals lizadibana lele Harare City ngase National Sports Stadium.

NgeSonto iqembu le Yadah lizadlala lele Chapungu ngase National Sports Stadium, iqembu le ZPC Kariba lizadlala lele Black Rhinos ngase Nyamhunga, iqembu le Hwange lizangqikilana lele Mushowani ngase Colliery, iqembu le TelOne lizemukela ele CAPS United ngase Ascot kuthi umdlalo obekumele ube phakathi kweqembu le Chicken Inn lele Triangle udluliselwe phambili ngoba iqembu le Triangle lizabe lidlala lele Nouadhibou elase Mauritania kuhlandla lesibili elesigaba se play off kumncintiswano we CAF Confederation Cup. Lumdlalo uzaqhutshelwa enkundleni ye Barbourfields ko Bulawayo.

please wait

No media source currently available

0:00 0:03:01 0:00

Facebook Forum

XS
SM
MD
LG