Abalandeli beqembu le Highlanders bathi kabathengiselwe impahla elophawu lweqembu ukuze iqembu liyale lilokhu lithola imali loba kungelamidlalo.
Iqembu le Highlanders lisenkingeni eyokufulathelwa ngabakade belisekela ngemali eyokuholisa abadlali labaqeqetshi abenkampani ye NetOne.
Lokhu kutshiye iqembu leli lisesikhaleni ngoba lingenelisi lokuthola imali evela kubalandeli bebhadala ukuzongena enkundleni njengoba imidlalo imiswe ngumkhuhlane we COVID 19.
Umlandeli weqembu le Highlanders ohlala elizweni le South Africa uMncedisi Siziba uthi udaniswa yikuba iqembu selihamba licela usizo lona lilethuba elokuzenzela imali ngokuthengisa impahla elophawu lweqembu.
“Ngibe lokudana nxa ngisizwa kuthiwa ithimu yezwelonke isihamba icela izimali khona kulendawo enjenge clubhouse lapho okungafakwa amakawuso, amakepesi, kuthengiswe utshwala abantu abathanda iqembu bathenge.
Ukucela akwaze kwasiza muntu kodwa indoda kumele izicabangele layo,” kutsho uSiziba.
Intathelizindaba yezemidlalo uNash Mkokwayarira uvumelane lo Siziba esithi ngabalandeli leliqembu elilabo akumelanga lihawule.
“Iqembu le Highlanders sekumele libe labantu abananzelela ukuba umdlalo wenguqu kathesi sekuyibhizimusi hatshi ukuchazwa yikuthi balabalandeli kuphela.
Kunengi abangakwenza okubalisa ukuba lamalunga abhadala imali nyangazonke kanye lokuxhasana lamankampani kube lezivumelwano eziphathisa nxazombili.
Okunye njalo leliqembu lingenza imali enengi ngokuba lesitolo esithengisa impahla elophawu lweqembu,” kutsho uMkokwayarira.
Isikhulumeli seqembu le Highlanders uRonald Moyo uthi impahla elophawu lweqembu ikhona elizweni le China njalo inhlelo zokuletha leyo mpahla ziphazamiswe yikuqhamuka komkhuhlane we COVID 19.
Emalangeni iqembu le Highlanders liphiwe imali kanye lenyama ngomela indawo ye Insiza edale lephalamende uFarai Taruvinga njalo umgcinisihlalo waleliqembu uKenneth Mhlophe uthe lesisipho siphathise kakhulu ngoba kulezinsuku bengelandlela eyokuthol