amalinks wokungena

Breaking News

Abalandeli beHighlanders: Lonyaka Silethemba Lokuthi IBosso Izodlala Kuhle


Abalandeli beHighlanders Bosso

Inengi labalandeli beqembu leHighlanders ababukele leliqembu emidlalweni yalo emibili eliyidlale kumncintiswano wenkezo ye ZNA Commander’s Charities Shield bathi leliqembu lizakwenza izimanga ikakhulu nxa bona njengabalandeli balo bengaba lokubekezela abadlali abasakhulayo abafakwe ngumqeqetshi uMadinda Ndlovu ethimini baze bajwayele ukudlala bendawonye.
UMandla Nkala ohlala elizweni le Botswana kodwa olandela iqembu le Highlanders maviki wonke uthi nxa abalandeli bengaba lokubekezela iqembu leli lingaphakamisa isicoco seligi lonyaka.
Mina ngingu Mandla Nkala owe Highlanders Botswana Chapter. IHighlanders yiyo ephakamisayo lonyaka njalo asibuyeli emuva. Abafana bethu badlala kuhle kakhulu njalo akula lapho esizabe sibatshayela khona ukhwelo sizabe sibakhuzezela sibahlabelela ukuze ithimu iye phambili. Kubo bonke abalandeli beqembu le Highlanders ngicela ukuthi sikhuzezele ithimu singabatshayeli ukhwelo ngabafana abancane basafunda njalo singabapha nje imidlalo embalwa bazabulala amathimu wonke.
UMayibongwe Ndlovu laye uthi abalandeli kumele baphe umqeqetshi uMadinda Ndlovu ithuba elokuba ahlanganise kuhle iqembu lakhe ukuze leliqembu liphumelele.
Asipheni abafana bethu isikhathi njalo singenza njalo konke kungalunga nje ngemva kwemidlalo embalwa ngoba umqeqetshi laye usazama ukuba ahlanganise lapha lalaphaya njengoba kungabafana abasakhulayo. Singabasekela singatshayeli ukhwelo njengoba ithimu isaqala konke kuzasilungela njalo singasithatha isicoco seligi.
Omunye njalo umsekeli othe yena oyingxenye yalabo abacula kakhulu behaya iqembu behlalele eceleni lenkundla elifulathele ibhukutsho elaziwa kakhulu ngegama elithi eSoweto uthi abalandeli kuzamele benze owabo umsebenzi bayekele umqeqetshi uMadinda laye ayenze owakhe.
Lona iqembu limi kahle kodwa engikucelayo yikuba abalandeli befake amaphaphu phansi. Iqembu lethu lifuna imidlalo emithathu kuphela njalo thina abe Soweto Choir kasiqineni ngengoma kuphela sitshiye uMadinda ayenze umsebenzi wakhe.
Iqembu le Highlanders licine ukuphakamisa isicoco seligi ngomnyaka ka 2006 njalo eminyakeni edluleyo abalandeli balo bakhuthaze ukuba libuyele kusiko lwalo lwakudala olukuzikhulisela abadlali litshiyane lokuthenga abadlali.
Lonyaka ke inkokheli zeqembu ziphendukise umqeqetshi uMadinda Ndlovu laye okhulele kilo iqembu le Highlanders njalo olendumela zokudlalisa abafana abasakhulayo.
Ngemva komdlalo wangeSonto lapho iqembu le Highlanders elinqotshwe khona ngele Dynamos ku final yenkezo ye ZNA Commander’s Charities Shield uMadinda uthe abantu bengathi iqembu le Bosso lakhiwa kutsha kodwa iqiniso ngelokuba kuvuselelwa amasiko alo.

Ezemidlalo siloJoseph Njanji
please wait

No media source currently available

0:00 0:02:45 0:00

Facebook Forum

XS
SM
MD
LG