Umqondisi we Commercial Farmers Union uMnu. Deon Theron uthi abalimi abanengi bayesaba ukulima emasimini ngenxa yokuthi ibandla le Zanu PF selitshele abanye babo ukuthi balakho ukulahlekelwa ngamapulazi abo lonyaka.
UTheron uthi ibandla leli lithi lifuna ukwabela abasekeli balo amapulazi angakathathwa nguhulumende.
Uthi lokhu sokwenze ukuthi lamabhanga esabe ukunika abamhlophe izikwelede zokuthenga inhlanyelo lokunye nje okokulimisa.
Uqhubeke ethi abalimi abamhlophe sebeyekele ukulima lonyaka njengoba belakho ukulahlekelwa yizilimo kanye lamapulazi.
Kusenjalo, abalimi abamnyama abase Murehwa, Mashonaland East, bathi kabenelisanga ukuthola inhlanyelo kuselesikhathi sokulima njalo bayehluleka ukuthola imvundiso ye fertilizer enikwa abantu abasekela ibandla le Zanu PF.
Kodwa-ke abalimi be Gokwe kwele Midlands babona angani lonyaka bazatshaya inala.
Omunye wabalimi laba uMnu. Charles Khumalo uthi loba kunjalo abalimi balakho ukungahambisi isivuno sabo eGrain Marketing Board ephuza ukubabhadala.
