Abalimi abatsha abagoqela abasekeli bebandla le Zanu PF abalezikhundla eziphezulu babikwa sebelobudlelwano labamhlophe abathathelwa umhlabathi kuhlelo lokwaba lumhlabathi olwaqaliswa ngomnyaka ka 2000.
Umnu. Charles Taffs, umsekeli womqondisi we Commercial Farmers Union, uthi lobubudlelwano benziwa ngabamhlophe abangasela ndawo yokulima njalo labalimi abatsha abangenelisi ukulima ngenxa yokuswela amacebo okulima lemali yokuthenga okusetshenziswa emapulazini.
U Lord Anthony St. John owe House of Lords utshele idale le House of Lords eBhilithane kuliviki ukuthi banengi abamhlophe abalahlekelwa ngamapulazi asebebhadala abensundu abathatha umhlabathi wabo ukwenzela ukuthi baziphilise.
Umnu. Mandla Nkomo ingcwethi ecubungula ezokulima utshele uGibbs Dube we Studio 7 ukuthi kumele ubudlelwano lobu buqhubekela phambili nxa bungathuthukisa ezokulima eZimbabwe.
Kusenjalo, uMnu. Methuseli Moyo, isikhulumeli sebandla le Zapu uthi ibandla lakhe selibambisana lalabo abalwa impi ye nkululeko bekuvuyo le Zimbabwe People’s Revolutionary Army (ZIPRA) ukwenzela ukuvikela abamhlophe abasele emapulazini abanceda uzulu okwamagama.
