Abalimi kwele Zimbabwe abathatha amapulazi abamhlophe kusukela ngomnyaka ka 2000 abehluleka okwamanje ukubhadala umthelo we Zimbabwe Electricity Supply Authority (ZESA) babikwa sebekhulumisana lenkampani le ukwenzela ukuthi kuphungulwe izikwelede zabo kumbe bengacitshelwa umlilo kagetsi.
Abaqondisi be ZESA abakhulume le Studio 7 bathe abalimi bakhala ngokuthi bathola kanye inzuzo yokulinywayo ngomnyaka okwenza ukuthi behluleke ukubhadala izikwelede zomlilo kagetsi.
Abalimi abakunhlanganiso ye Zimbabwe Farmers Union kanye le Zimbabwe Commercial Farmers Union bathi akwenzakali ukuthi babhadale izikwelede ze ZESA ngenxa yokuthi abenzi imali enengi emapulazini.
Abanye babo balezikwelede ezifika inkulungwane ezingamakhulu amathathu amadollar eMelika.
Kubikwa ukuthi abanye abalezikwelede ze ZESA yimuli kaMongameli Robert Mugabe, umsekeli wakhe uMnu. John Nkomo lezinye iziphathamandla zikahulumende ezikudale le cabinet kanye labanye abalezikhundla eziphezulu kuhulumende womanyano.
Inkampani ye ZESA okwamanje yehluleka ukubhadala izikwelede ezedlula izigidi ezingamakhulu ayisitshiyangalombili zamadollar eMelika.
Umnu. Themba Dlodlo ofuya inkomo ezitshiyeneyo uthi abalimi laba kumele bagcine imali yokubhadalela umlilo kagetsi.