Abalwa impi yenkululeko abangamatshumi phose amane, 39, ababotshelwe ukutshengisela ngoLwesibili bekhonona ngokuthi iholo labo lincane kakhulu, balokhe bevalelwe.
Inhlanganiso yamagqwetha abamelayo, iZimbabwe Lawyers for Human Rights, yethule umbiko enkundleni yeTwitter isithi abantu laba bavalelwe enkambeni ezine edolobheni leHarare njalo bazamiswa enkantolo ngoLwesine.
Linhlanganiso ithi abasolwa betheswa icala lokubuthana ngaphandle komthetho ngenjongo yokubangela udlakela.
Abalwa impi yenkululeko laba bathi iZ$16,000 abayihiliswa nguhulumende ngenyanga ayibenelisi lutho. Ngokunjalo, bathi kumele yengezwe ngoba yibo abakhulula ilizwe.
Abanye bathi ukubotshwa kwabantu laba, abangabasekeli beZanu PF, kungaba kuveza ukuthi sokulodonselana kunkokheli zebandla leli. Khepha abanye bathi amapholisa enza umsebenzi wawo ngokufaneleyo.