Inhlanganiso elwela amalungelo abalwa impi yenkululeko eyeZimbabwe National Liberation War Veterans Association ithi ifuna ibizo legceke lendizamtshina eleRobert Mugabe International Airport, liguqulwe ngoba owayengumongameli usengumthengisi ngokuthi usekela umkhokheli womanyano wamabandla aphikisayo oweMDC Alliance uMnu. Nelson Chamisa.
Ekhuluma emhlanganweni lentathelizindaba, unobhala jikelele walinhlanganiso uMnu. Victor Matemadanda uphinde wachothoza umongameli Donald Trump weMelika ngokungesuli izijeziso ilizwe lakhe elazethesa eleZimbabwe esithi uyabandlulula abantu abamnyama.
Uphinde wasola inkokheli zeMDC Alliance ezibalisa uMnu. Chamisa, uMnu. Tendai Biti, kanye legqwetha lalelibandla uMnu. Thabani Mpofu esithi yibo abakhuthaza eleMelika ukuthi lethese eleZimbabwe izijeziso zenotho. UMnu. Matemadanda uthi kufanele ibandla leMDC-T likhethe umkhokheli omutsha ngoba uMnu. Chamisa wahluthunela uNkosazana Thokozani Khupe umbuso. Wengeze wathi eleMelika lisekela iMDC Alliance, yikho kulodaba oluthethwayo emthethwandaba weConstitutional Court oluphikisa ukunqoba kukamongameli Mnangagwa.
Ibandla leMDC-T elikhokhelwa nguMnu. Nelson Chamisa selethule umbiko lichothoza amazwi la, lisithi abalwa impi yenkululeko bengangeneli kokwenzakala ebandleni labo.
Ukuhlaziya loludaba, sixoxe loMnu. Max Mnkandla, ingcwethi ecubungula ezombusazwe njalo owalwa kumpi yenkululeko ekuviyo leZIPRA. UMnu. Mnkandla uthi wonke umuntu ulelungelo lokusekela ibandla alifunayo.
