Abalwa impi yenkululeko bekuvuyo leZimbabwe African National Liberation Army (ZANLA) akade bezama ukugebha ingcwaba lika Cecil John Rhodes belenjongo yokuthatha amathambo akhe bawathumeze kwele Bhilithane, balisiwe yinduna yeMatobo kanye lohulumende.
Laba bantu abakade bengamatshumi amahlanu babikwa befike entabeni zeMatojeni duzane le Njelele ngenyanga ephelileyo bephethe amathambo abanye babo abafela eMozambique ngesikhathi sempi. Babikwa bebethwele izimbo lemitshina yokugebha ingcwaba leli.
Kodwa-ke induna uMasuku weMatobo wembe phansi wabatshela ukuthi bayahlola wabikela lohulumende othethe isinqumo sokuthi kumele bengabambi ingcwaba lika Rhodes elilethela ilizwe imali enengi ehlwawulwa yizethekeli ezivela kwamanye amazwe.
Abantu laba abakade befuna ukugebha ingcwaba leli babikwa lokhe bezulazula ezintabeni lezi kungaziwa ukuthi bajongeni.
Umnu. Godfrey Mahachi omele ugatsha lukahulumende olubona ngendawo ezigcinwe okusemthethweni eZimbabwe uthi loba uRhodes wayengu mhuquluzi wenotho, ingcwaba lakhe alimelanga ligejwe njengoba ilizwe lithole imali esihonqweni se Matobo njalo watshiya lezinye indawo ezinjenge zikolo ezinceda uzulu.
Umnu. Thabani Khumalo omele inhlanganiso ye Mzilikazi Heritage Trust uthi okwenziwa ngamadoda la azithi alwa impi yenkululeko kulihlazo emphakathini.
