Abalwela amalungelo oluntu sebesole kakhulu uhulumende weleBhilithani ngokubuyisela muva izizalwane zeZimbabwe ezancitshwa ubuphepheli kulelolizwe.
Ugatsha lwendaba zasekhaya eBhilithani lwazise ukuthi abantu abedlula ikhulu bazabuyiselwa eHarare ngendizamtshina mhlaka 22 kuliviki.
Lanxa abalwela amalungelo kazulu besithi abantu laba balakho ukuhlukuluzwa kumbe ukubulawa nguhulumende kaMongameli Emmerson Mnangagwa, eleBhilithani lithi abantu laba yizigebengu ezabanjwa ngamacala atshiyeneyo ezingaselalo ilungelo lokuhlala kulo.
Umphathintambo obona ngokwethulwa kwemibiko eZimbabwe uNkosikazi Monica Mutsvangwa kaphendulanga imibuzo esimthumele yona.
Olwela amalungelo uMnu Difa Dube ngomunye osole kakhulu eleBhilithani esithi yinto engalunganga ukuthi abantu laba batshiyiswe abantwababo, bona abayizizalwane zalelolizwe.
