amalinks wokungena

WFP: Abantu Abedlula Isigidi Lengxenye Bazafuna Ukudingelwa Ukudla Ngomnyaka Ozayo

  • Gibbs Dube

Inhlanganiso yamazwe wonke ekhangelane lokudla kukazulu iUnited Nations World Food Program ithi abantu abedlula isigidi lenkulungwane ezingamakhulu amahlanu – 1.6 million bakhangelelwe ukuthi bazafuna ukuphiwa ukudla kusukela ngoZibandlela kusiya kuMbimbitho ngomnyaka ozayo.

IWFP ithi ukuhlolisiswa okusanda kwenziwa zinhlanganiso ezizimele zodwa kutshengisa ukuthi banengi kakhulu abazafuna ukudla kulalokho okade kucatshangelwa.

Inhlanganiso le ithi isilinganiso sabalambayo nxa sokuqathaniswa lanyakenye sikhuphuke ngokungamatshumi ayisithupha ekhulwini – 60%.

Iphinde yathi izisebenzi zayo sezibone ukuhlupheka okumangalisayo eZimbabwe lapho abantu makhaza asebethintithe iziphala zabo njalo labanye abathengisa inkomo ngemali ephansi okwamagama ukwenzela ukuthenga ukudla.

IWFP ithi izabambana lezinye inhlanganiso ekunikeni uzulu ukudla okutshiyeneyo okunjengempuphu, indumba lamafutha okupheka.

Okwamanje idinga izigidi ezingamatshumi ayisitshiyangalombili lasikhombisa zamadollar– $87 million. Yayi khangelele ukuthi kuzasetshenziswa phose izigidi ezilikhulu lamatshumi amabili amadollar eMelika - $119 yokuthenga ukudla.

UNkosikazi Victoria Cavanagh isikhulumeli senhlanganiso le uthi ezinye izakhamizi zizanikwa imali yokuthenga ukudla.

Unkosikazi Faith Ncube ingcwethi yokuthuthukisa inotho kazulu ozimele yedwa utshele ugibbs dube we studio 7 ukuthi kulendlala emangalisayo ezabelweni ezinengi.

XS
SM
MD
LG