amalinks wokungena

Breaking News

Abantu Bathi uNkosikazi Gace Mugabe Waxotshisa URobert Mugabe Umsebenzi


UNkosikazi Grace Mugabe lomkakhe uMnu. Robert Mugabe bese Tsholotsho kumkhosi wePresidential Youth Interface Rally.

Kulabantu abanengi eZimbabwe abathi uNkosikazi Grace Mugabe wenza ukuthi umkakhe, uMnu. Robert Mugabe, atshiye isikhundla sikamongameli welizwe.

Bathi lokhu yikho okwenza ukuthi ibutho lihluthune intambo zombuso selibona ukuthi uNkosikazi Mugabe wayesefuna isikhundla somkakhe.

Abakhulume lomsakazo weVOA Studio 7 bathe uMugabe watshiya isikhundla sikamongameli eseyangiswe okumangalisayo ngunkosikazi wakhe owayethuka abanye abakubandla leli okungelankawulo.

Bathi kwakusobala ukuthi uNkosikazi Mugabe wayefuna ukuthi kufika umhlangano weZanu PF Extra Ordinary Congress ozakwenziwa kunsukwana ezilandelayo, esiphendle indlela yokuthi abengumsekeli kamongameli.

Bathi lokhu kwakuzakwenza ukuthi acine esengene esikhundleni sikamongameli ngoba umkakhe wayesekhanya ukuthi usephela amandla ngenxa yokuluphala.

UMnu. Robert Mugabe lomkakhe, uNkosikazi Grace Mugabe.
UMnu. Robert Mugabe lomkakhe, uNkosikazi Grace Mugabe.

Okwamanje usevalelwe phandle kwakho konke okwenzakala kubandla leli kulandela ukugenqulwa kukaMugabe embusweni nguMnu. Emmerson Mnangagwa, owabambisana lebutho ukuthi athole isikhundla sikamongameli welizwe leZimbabwe.

Omunye walabo abathi uNkosikazi Mugabe wenza ukuthi umkakhe atshiye umsebenzi nguMfundisi Tapfumaneyi Clement Zenda, owenhlanganiso ye Christian Voice International, othi ukwenza kwakhe kwakhuba abantu abanengi eZimbabwe, ikakhulu kubandla elibusayo eleZanu PF.

UMfundisi Zenda uthi akusamelanga abantu bazihluphe ngoNkosikazi Mugabe ngoba usengumuntukazana.

Lokhu kusekelwe nguMnu. James Kamwendo, isakhamuzi sakoBulawayo, othi kusobala ukuthi uMnu. Mugabe watshiya isikhundla sakhe ngenxa yomkakhe owayelomlomo ongahlalwa mpukane.

Imbono kaMnu. Kamwendo igcizelelwe nguMnu. Themba Lunga, isakhamuzi seKariba, othi kwaba liphutha elikhulu ukuthi uMugabe avumele umkakhe ukuthi athethise abantu emphakathini abagoqela owayengumsekeli wakhe engakaxotshwa, uNkosikazi Joice Mujuru, uMnangagwa lamanye amalunga ebandla leZanu PF.

Ubona engani lokhu kwakungeke kwenzakale ngabe unkosikazi kaMugabe wokuqala, umuyi uNkosikazi Sally Mugabe, wayesaphila.

UMnu. Joseph Tshuma, omele iPelandaba-Mpopoma kudale lephalandende ekubandla leZanu PF, laye uthi uNkosikazi Mugabe wadonsela umkakhe edakeni.

UNkosikazi Mugabe kwesinye isikhathi wayesethula amagama asindayo emphakathini esithi kulabantu abafuna ukususa umkakhe esikhundleni okungekho emthethweni.

UMugabe utshiye umsebenzi mhlaka 21 ngoLwezi ibutho lesizwe lize lihluthune intambo zombuso lisithi kulabantu abakucele le Generation 40 abaphazamisa ukubusa kwakhe.

Ibutho lathi uNkosikazi Mugabe labanye bakhe basebebusa okungekho emthethweni.

'UGrace Mugabe Wenza Ukuthi Umkakhe uRobert Mugabe Akhitshwe Ngenkani Esikhundleni'
please wait

No media source currently available

0:00 0:03:56 0:00

Facebook Forum

XS
SM
MD
LG