amalinks wokungena

Breaking News

Abantu Batshengisela Benanza Ilanga Elanyamalala uDzamara


Abantu befola benanza ilanga elanyamalala intathelizindaba u-Itai Dzamara

Amakhulu abantu beZimbabwe, abaphume ngobunengi, ukuyafola ezitaladeni zeHarare ukunanza umnyaka selokhu uItayi Dzamara, intathelizindaba elwela ilungelo loluntu, wanyamalalayo nyakenye ngemva kokuthunjwa ngabacatshangelwa ukuthi ngabezomvikela, bohlangothi lwabasebenza nsita.

Uzulu ufole ehlabela, ehamba ngomgwaqo uJason Moyo, ejika ukungena kuRotten Row eHarare. Lokhu kufola obekuke kwavinjwa ngamapholisa ngaphambilini, kuqhubekele phambili ngemva kokuba abemhlanganiso ye Occupy Africa Unity Square, ebikhokhelwa ngu Dzamara, becine bekhweza lolu daba emthethwandaba ocine uvuma ukuthi kuqhubeke. Lokhu kutshengisela bekungokokunanza umnyaka selokhu omunye wabo uItayi wanyamalalayo.

Umkhokheli weMDC-T umnumzana Morgan Tsvangirai laye ubekhona ekufoleni kokunanza ukunyamalala kuka Itai Dzamara
Umkhokheli weMDC-T umnumzana Morgan Tsvangirai laye ubekhona ekufoleni kokunanza ukunyamalala kuka Itai Dzamara

Umkhokheli weMDC-T umnumzana Morgan Tsvangirayi, obe khona laye kulokhu kufola utshengise ukudana phezu kokuthunjwa kukaDzamara labanye abangaziwayo ukuba bakuphi, wacebisa uhulumende kamongameli Robert Mugabe lenkokheli kwezomvikela ukuba zehlukane lalumkhuba.

Ubekhona laye umkhokheli we Youth Advocacy for Reform and Democracy (Yard), umnumzana Themba Mliswa, ethi ngoba esebuzwisisa ubuhlungu bokuhlukuluzwa lokuthunjwa kwabantu selokhe waphumayo ebandleni leZanu PF.

Omunye wamalunga ekhomidhi ye Occupy Africa Unity Square, eyisiphathamandla njalo seYARD eHarare, umnumzana Stephen Sibanda, uthi kuyajabulisa ukuba uzulu usekuzwisisa ukuqakatheka kokuphatheka emikhosini yalolu hlobo, ukulwela ilungelo loluntu.

Kodwa umnumzana Pride Mukono, oyingcwethi kwezombusazwe lenhlalakahle yabantu, uthi lanxa uzulu ephume ngobunengi, lokhe eseselokwesaba okuthize njengoba bebekhona abekade bebabukele, belunguza kumafasitele, besesaba ukuzaphatheka labo.

Wengeza uMukono ethi kuyinto edanisayo ukuba ngeyodwa kuphela inkokheli yamabandla ezombusazwe,eze kulokhu kufola lanxa wonke ebenxunsiwe.

Umbuthano weAfrica Unity Square wabakade betshengisela benanza ukunyamalala kuka Itai Dzamara
Umbuthano weAfrica Unity Square wabakade betshengisela benanza ukunyamalala kuka Itai Dzamara

Ubuyele wayabuthana eAfrica Unity Square uzulu, lapho lokhu kufola okuqalele khona, inkokheli zenhlanganiso ezehlukeneyo kanye labezombusazwe bebesipha amazwi wokuqinisa imhuli yako Dzamara kunye lalabo ayesebenza labo kule mikhankaso yokuba umongameli Mugabe asuke esikhundleni phansi kweOccupy Africa Unity Square.

Bafole ngokuthula laba bantu kungekho kuphazamisa abanye abekade bezenzela imisebenzi yabo kanye lokungabhidlizi impahla, lanxa amapholisa bengekho ukubakhapha kulokhu kufola.Ebebonakala kungamaxuku lapha lalaphayana amapholisa abehlomile,kodwa akazange awuphazamisa.

Bekugiywa, kuhlatshelwa ingoma ebezigcwele ubuhlungu, inengi likhankasela ukukhululwa kukaDzamara lapho akhona, loba ukutsho ukuba usaphila loba hatshi njalo lokuthi uhulumende awahloniphe amalungelo kazulu, ehlukane lomkhuba wokuvimba abantu ukutshengisela ukukhonona kwabo.

XS
SM
MD
LG