amalinks wokungena

Breaking News

Kuqhamuka Ukulwisana Phakathi Kwamapholisa Labakade Betshengisela eHarare


Kuqhamuke ukulwisana phakathi kwamapholisa labantu abakade betshengisela besola inkokheli yamazwe angezansi kwezwekazi leAfrica endaweni lapho okuzaqhutshelwa umhlangano wenkokheli zamazwe akumanyano we Southern African Development Community eHarare ngesikhathi inkokheli lezi seziqalisa ukufika eZimbabwe ukuzongena lumhlangano oqala Ngolwesithathu.

Abantu abedlula amakhulu amabili babuthene lapho okuhlangana imigwaqo uJason Moyo Street lo Julius Nyerere Way bafola besiya ehoteleni ehlala inkokheli le yeSADC eye Meikles hotel bethwele amabhakane ebhalwe amazwi okusola umongameli Robert Mugabe, bekhokhelwa ngabasakhulayo be MDC-T.

Amanye amabhakane la abe lotshwe ukuba: “SADC: Sifuna ukhetho olukhululekileyo eZimbabwe”.

Abatshegniseli laba bathe befika eMeikles Hotel, kulapho amapholisa aqhale ukubatshaya bachithekana bebaleka kodwa batshiya amabhakane abo esangweni lehotela le. Eyinye yenkokheli yeSADC ebisifikile iphumile yayabala amabhakane la njalo ibibukele amapholisa ebhaxabula abakade betshegnisela laba.

Ngemva kwesikhatshana lokhu kwenzakele kulamapholisa abikwa etshaywe agijinyiswa ngelinye ixuku labakade betshengisela duzane lesigodlo seMDC-T ese Harvest House kodwa acina ebiza abanye babo baphenduka sebebanengi batshona begombolozele lindawo ilanga lonke.

Umongameli Edgar Lungu, weleZambia okhangelelwe ukuvula okusemthethweni umbukiso wezokuthengiselana owe Zimbabwe International Trade Fair ngoLwesine ngomunye wabakhokheli asebefikile elizweni. Inkokheli yamazwe eSADC ikhangelelwe ukuhlangana kusasa ngemva komhlangano wabampathintambo ophele lamhlanje. Ngesikhathi sisiya emoyeni umhlangano wabampathintambo lo ubu lokhe uqhubeka ngasikhathi sinye uMugabe ehlangana lomunye wakhe wakwele Zambia e State House.

Eyinye inkokheli ikhangelelwe ukufika ngoLwesibili ntambama kodwa umongameli Jacob Zuma wakwele South Africa ukhangelelwe ukufika NgoLwesine ekuseni umhlangano ungakaqalisi.

Indikimba yalumhlangano ojonnge ukudinga indlela zokuththukisa ezokuthengiselana phakathi kwamazwe la, ithi: Regional Strategy and Roadmap for Industrialization.

XS
SM
MD
LG