Abantu abanengi baveze ukukhathazeka ngokungananzwa kwesinqumo somthethwandaba weHigh Court sokulaya amapholisa ukuba engavimbi uDr Peter Magombeyi ukuya kwele South Africa ukuyakwelatshwa.
UDokotela Peter Magombeyi ubikwa lokhu esesibhedlela seAvenues eHarare lapho ayelatshwa khona ngemva kokuba amapholisa emvimbe ukugada indizamtshina esilindweni se Robert Mugabe Airport ukuze aye kwele South Africa.
Izolo uMagombeyi ubikwa ehlukuluzwe ngomunye okade ezithi ulipholisa ongabethwanga ngegama esibhedlela. Lundoda ubikwa esukele uMagombeyi ngenqindi wamlimaza ingalo phambi kwamagqwetha akhe loyise. Izehlakalo zayizolo zenze kwabuyelwa emthethwandaba namhlanje amagqwetha kaMagombeyi edinga ukuba avunyelwe ukuyakwelatshwa lapho afuna khona.
Ingcwethi ecubungula ezombusazwe, umnumzana Charles Nyoni usole kakhulu amapholisa esithi akahloniphi umthethwandaba weHigh Court
“Kanti mhlawumbe nxa uhulumende engasalandeli lokhu okukhulunywe ngumthethwandaba weHigh Court kutshoni. Bazama ukusitshengisa ukuthi kabalani lomthetho, okwakuqala bathi uPeter akathunjwanga , wazibalekela, kathesi sebesitshela ukuthi akasafanelanga ukuthi ayelatshwa, kuyini abazama ukukuvala ukuthi kungayibonakala ngodokotela eSouth Africa ngoba sonke siyazi ukuthi lokho abamhlabayo emzimbeni wakhe engahamba kuyabonakala. Sebezama ukuthatha isikhathi ukwenzela ukuthi lokhu abamhlaba khona kucine kuphela emzimbeni”
Ingcwethi kwezombusazwe umnumzana Tjenesani Mtungagwa yena othe lokhu sekutshengisela ukuphelelwa ngamacebo osekusenziwa nguhulumende.
“Mina ngingathi udaba luka doctor Magombeyi ludaba olubuhlungu. Sewatholakala kodwa khathesi bayamalisa ukuthi abe ethola usizo eselatshwa. Mina ukubona kwami sokutshengisela ukuthi uhulumende lo usephelelwa, usekhona ukuthi eqede izizalwane zaseZimbabwe”
Omunye olwela amalungelo oluntu umnumzana Mlungisi Mafela uthe amapholisa kufanele abe yiwo alondoloza umthetho hatshi ukuwephula umthetho.
“Isenzo lesi esenziwe ngamapholisa ukubana bephikisane lesinqumo somthethwandaba weHigh Court kuyadanisa kakhulu ngoba sikhangelele ukubana amapholisa yiwo alondoloza umthetho elizweni besebenza labomthethwandaba kodwa nxa sekusenzakala ukuthi bengalandeli izinqumo zomthethwandaba kuyadanisa kakhulu njalo kutshengisa ukuthi siphila elizweni elingalandelwa khona umthetho kutshengisela ukuthi uhulumende ngoweqoqodo kuyinto embi kakhulu ngoba umthetho yiwo okumele ulandelwe”
Uhulumende yena lokhe eqina ngelokuthi uMagombeyi ukhululekile ukuya lapho afuna ukwelatshwa khona.
Umpathintambo wezokwethulwa kwemibiko, uNkosikazi Monica Mutsvangwa uthi amapholisa akhona ukuvikela uMagombeyi hatshi ukuthi amvimbe ukuya kweleSouth Africa.
Uqhubeke ethi kulamadoda alitshumi lanhlanu (15) abuye izolo efuna ukumthatha esibhedlela lapho amapholisa abuye avikela uMagombeyi esalisa laba bantu ukuthi bamthathe.
“Uhulumende ufuna ukwazisa uzulu ukuthi amapholisa alinde uMagombeyi ngendlela yokumvikela kuze kuyefika isikhathi lapho ababona esesenelisa ukuya kwele South Africa ekhululekile”
Inengi lithi lokhu kuveza ukuba uhulumende usebenzisa umthetho lapho afuna khona aphinde awephule lapho abona angani awuvumelani lezifiso zakhe.
Abalwela amalungelo oluntu bathe lokhu kuyingozi enkulu ekulondolozwen kwamalungelo oluntu elizweni. UMahluli womthethwandaba weHigh court uJustice George Chiweshe walise intathelizindaba ukuthi zingene edale lapho uskomitshi wamapholisa uGodwin Matanga abe zama ukuthi kuguqulwe isinqumo esethulwe nguJustice Happias Zhou esalela amapholisa ukuvimba uMagombeyi ukuya kweleSouth Africa ukuyakwelatshwa.
Igqwetha elilwela amalungelo oluntu uBeatrice Mthethwa walelwe imizamo yakhe yokuvunyelwa ukungena kwentathelizindaba ukuthi ukuyalela loludaba luthethwa.
