amalinks wokungena

Breaking News

Kulabanye Abantu Abathi Uhulumende Wenze Kahle Ngokwethula Iziqondiso Ezintsha ezeCOVID-19 Lockdown


Kulabanye abantu eZimbabwe abamukele ngenjabulo inyathelo likahulumende lokuqinisa iziqondiso zokwenqabela ukusabalala kwegciwane leCOVID-19 besithi bekuvele sekuphuzile njengoba ubusumemetheka ngamandla umkhuhlane weCoronavirus elizweni.

Umsekeli kamongameli, uMnu. Constantino Chiwenga, uthe esethula izolo iziqondiso ezintsha zokuvimba ukumemetheka kwegciwane leCOVID-19 wakubeka sobala ukuba ilizwe selisenkingeni yokumemetheka ngamandla komkhuhlane lo.

Uthe kulabantu abafika phose amakhulu ayisithupha – 596 abahlolwe kunsukwana ezedluleyo batholakala belomkhuhlane weCOVID-19 kwabhubha abangamatshumi amabili lasithupha – 26.

Uthe lokhu yikho okwenze uhulumende ukuba afake imigoqo eqinileyo kusukela kusasa ukwenzela ukuvimba ukumemetheka kwegciwane leCOVID-19.

“Akusamelanga abantu baye emihlanganweni ngaphandle kwabalutshwana abaya emfeni. Akusamelanga lihambe emitshadweni, kwezemidlalo lokunye."

UMnu. Shelton Masina, uyekusekela okwethulwe nguChiwenga, ongumphathintambo wezempilakahle.

“Kufanele ukuthi ngaye uhulumende wenza lento kudala, ngoba siyabona abantu ma behamba, abaselandaba lokufaka ama-mask lokwenza leyo social distancing, sebeziphilela nje. Especially emabhasini lawa awe-ZUPCO, akusela ngitsho la-Social Distancing, ekungani vele i-Corona seyedlula, kodwa sithi thina nga waqala, ukukwenza lokho kudala."

UNkosikazi Sithabile Ndlovu uthi lanxa evumelana lenyathelo likahulumende, ufisa ukuba uhulumende ancedise abantu ngesikhathi lesi.

UNkosikazi Abigail Mupambi, umqondisi wenhlanganiso ye#This Constitution, uyakusekela lokhu.

“Kunzima, ungakhangela isimo esikhona khathesi, abantu be-Zimbabwe besebezama labo ukuthi bangathi bayasebenza kancane kodwa ke hayi, sikhuluma ngomkhuhlane, iCOVID-19 ikhona, iCOVID-19 iyabulala. Khathesi sizwa udumo, ukuduma kwayonale indaba ye-Third Wave. ”

USikhwicamfundo Solwayo Ngwenya, osebenza eMpilo Hospital, uthi kumele abantu balimuke umkhakha olamandla amangalisayo owegciwane leCOVID-19 omemetheka okwamanje eZimbabwe.

“Sokutshiyene, lenhlandla lezi okuthiwa ngama-waves amabili lawa asedlulile, kumnyaka ophelileyo laleli eliyenze ngo-January, kutshiyene khathesi. Okwakhathesi, ibhubhane leli liyanamathela kakhulu okokuthi ungahamba lapho okulesiminyeminye khona, nxa kulomuntu oyedwa olalo ubhubhane lolu, luhle lunamathele abantu abanengi. Njalo abantu bayagula masinyane, abanengi bayasitshiya masinyane, abasahlali kakhulu lokhuyana okokuthi umuntu uyahlala banjwe ubhubhane lolu. Yinko abanye abantu sebeqala lokuthi bafele ezindlini."

UNgwenya uthi abantu kumele balandele iziqondiso ezethulwa yinhlanganiso yeWorld Health Organization lohulumende.

“Siyaxwayisa kakhulu mahlabezulu ukuthi lizinanzelele, njengoba libona lokhe ngikhuluma lapha emsakazweni, ukuthi ilizwi lifike ebantwini. Abantu abazalalela, bazaphila. Abantu abangalaleliyo njalo, asazi ukuthi kuzayenzakalani phambili, kodwa yikho esilokhe sixwayisa. Sesisendaweni embi kakhulu mahlabezulu, khathesi njengoba sasikhulumile ngesikhathi somqando wona lo, ibhubhane leli liyamemetheka okwamagama, esingazange sikubone kula amahlandla amabili adlulileyo.”

Uhlangothi lwezempilakahle lubika ukuba kulabantu abathathu ababulewe ngumkhuhlane weCOVID-19 izolo eZimbabwe kwathi abalikhulu lamatshumi ayisithupha lane – 164 bahlolwe batholakala belomkhuhlane. ICOVID-19 isibulele abantu abedlula inkulungwane lengxenye 1,632 eZimbabwe kusukela ngoMbimbitho nyakenye phakathi kwabafika phose inkulungwane ezingamatshumi amane – 39,852 abahlolwe batholakala bele COVID-19.

Udaba Esilethulelwe NguMavis Gama
please wait

No media source currently available

0:00 0:03:07 0:00


Facebook Forum

XS
SM
MD
LG