amalinks wokungena

Breaking News

Abantu beZimbabwe Bathi Akula Okokujabulela Ekunanzeni Uzibuse


Inengi labantu beZimbabwe bathi injabulo yaleli langa sebayithathelwa ngabebandla leZanu PF asebalenza elabo bodwa kulokuthi libe lilanga elinanzwa ngumuntu wonke oyisizalwane saleli lizwe.

Ilanga likamhlaka 18 Mabasa lonyaka, liza ngesikhathi ilizwe libhekane lenhlupho ezinengi kwezombusazwe lakwezenotho ezigoqela ukusilela kwamafutha ezimota kanye lokukhuphuka kwentengo yemphahla lokudla.

Uzulu ukhangelelwe ukuthi ukubuthana enkundleni ezitshiyeneyo zezabelweni zonke zelizwe lapho okuzabalwa umbiko kamongameli Emmerson Mnangagwa yiziphathamandla zalezo zabelo kuthi umkhosi omkhulu ube enkundleni eyeNational Sports Stadium eHarare.

Umnumzana Ostallos Siziba ingcwethi kwezombusazwe uthi kubuhlungu ukunanza leli langa ngoba uhulumende weZanu PF uqhubekela phambili encindezela uzulu.

“Thina njengabatsha kubuhlungu ukubana sesileminyaka eminengi sathola iindipendence kodwa abanengi abasebenzi, abala zindlu njalo amavoti aqhubeka entshontshwa yizo izinto ezahambelwa empini ukuthi kube le one-man-one-vote lendaba yomhlabathi, indaba yomsebenzi, indaba yokuncindezelwa kwabatsha so kimi ngokubona kwami kithi abatsha kubuhlungu ukuthi sithakazelele lokhu,”

Omunye wabatsha oyisakhamuzi seHarare umnumzana Tendai Moyo uthi ibandla le ZANU PF lasuka lathatha ilanga lokuthakazelela uzibuse lalenza elalo okwenza kube nzima ukuthi uzulu laye aphatheke.

“Ilanga le Independence lasuka kwaba lilanga le ZANU PF, yebo siyakwazi ukuthi balwa impi kodwa sekungani nxa ungasimuntu weZANU PF akumelanga lawe ubuye uzolithakazelela. Sekulilanga lapho abahlangana khona baqoqane enkundleni ezitshiyeneyo elizweni bezidlela nje kungela lutho oluzanceda uzulu ngakho ke kunzima ukuthi uzulu enelise ukulithgakazelela”

Kodwa owake waba lilunga ledale lephalamende emele iZhombe umnumzana McKenzie Ncube uthe loba ilizwe libhekane lenkinga ezinkulu kangaka ilanga likazibuse liqakathekile ekuthini uzulu akhumbule lapho avela khona njalo acebisane ukuze athuthukise ilizwe.

“Iindependence iqakathekile kakhulu esizweni seZimbabwe, kithi sonke njengabantu abathola uzibuse yebo inotho ayimanga kuhle kodwa yona ngokwayo iIndependence isitshela ukuthi konke kusezandleni zethu asikusebenzeni ngamandla ukuthi inotho yethu iqine,”

Umnumzana Thabani Nkiwane yena oyisakhamuzi seHarare uthe uhulumende kumele athathe ithuba lokubuthana kukazulu ngelanga likazibuse ukuthi amanyanise uzulu. Umfo ka Nkiwane uthe kubalulekile ukuthi ilanga leli kungabi lilanga lokukhankasela amabandla ezombusazwe ngoba kulilanga lokunanza umbuso kazulu onsundu.

“Udubo olukhona yikuthi uHulumende usuka athathe ilanga leli alifake kwezombangazwe, kodwa thina besifuna ukuthi kungaba ngcono ukuthi asebenzise ilanga leli libe lilanga lokubambanisa abantu, osuka ngapha losuka ngale sonke sibambane,”

Kunjalo nje, umongameli Emmerson Mnangagwa namhlanje emini yantambama, uhlangane labantwana abavela endaweni ezitshiyeneyo zeHarare lapho abezokwejisa labo, ngaphambilini kosuku lwelanga lokunanza uzibuse we Zimbabwe, mhlaka 18 Mabasa.

Ekhuluma embuthanweni Labantwana lo, uMnangagwa uthe uhulumende wakhe uyaqakathekisa imfundo yabantwana ngoba kuyibo insika yentuthuko yelizwe kwelakusasa.

UMnangagwa ukhengelelwe ukwethula umbiko oqakathekileyo mayelana lelanga lakusasa namhlanje ntambama, emsakazweni kamabonakude oweZBCTV, owe State of the Nation.

Udaba lokunanzwa kwelanga likazibuse siluphiwa nguGibson Bhebhe
please wait

No media source currently available

0:00 0:04:13 0:00

Facebook Forum

XS
SM
MD
LG