amalinks wokungena

Breaking News

WFP: Abantu Abafika Phose 3 Million Babhekane Lendlala eZimbabwe


UMnu. David Beasly, umqondisi wenhlanganiso yeWorld Food Program, loNkosikazi Lola Castro umqondiso wenhlanganiso le kuzwekazi leSouthern African Development Community.

Kulezizalwane zeZimbabwe ezedlula izigidi ezimbili (2.4 million) ezibhekane lodubo lokuswela ukudla okweneleyo lobanje indawo ezinengi zelizwe zithole isivumo esihle nyakenye.

Lokhu kwethulwe ngoLwesibili ngumqondisi wenhlanganiso ye United Nations World Food Programme, uMnumnzana David Beasley, emhlanganweni wabezindaba eJohannesburg.

Enkulumeni yakhe labezindaba, umnumnzana Beasley uthe iZimbabwe ngelinye lamazwe ayisithupha ezansi yezwekazi le Africa azabhekana lendlala enkulu ngenxa yokoma okubangelwa yikuguquka komkhathi.

Uthe ukuswelakala kwezulu kwezinye indawo zelizwe yikho okube yimbangela enkulu yokusilela kokudla kulaba abedlula izigidi ezimbili. Uthe okwamanje inhlanganiso yakhe isiza laba bantu ngokudla kanye lemali abathenga ngayo ukudla okwakha umzimba.

Uthe bakhangelele ukuthi lohulumende asebenze gadalala ukuxhasa inhlelo zabo lezi.

“Asithembeni ukuthi ukhetho luzaletha uhulumende ozakhokhela ngendlela eqondileyo ngoba singakhangela ukuthi iZimbabwe ibikuphi eminyakeni elitshumi edluleyo siyabona ukuthi akuso somiso kuphela esiyimbangela yendlala, kodwa kukhona okunye okwehlukeneyo.”

Inhlanganiso yeWFP ithi kwezinye indawo eZimbabwe iphathisa abalambayo laba ngenhlelo zokulima imibhida ukuze bazisize.

Njengobake iZimbabwe iphakathi kwamalungiselelo okhetho, bakhona abathi ukudla koncedo lokhu kusetshenziswa ngabanye kwezinye indawo njengesikhali sokuzitholela amavoti.

Kodwa-ke umqondisi weWFP ezansi yezwekazi leAfrica, uNkosikazi Lola Castro, uthi linhlanganiso yenza konke okusemandleni ayo ukubona ukuthi lokhu kudla akusetshenziswa kwezombusazwe.

“Silabo abaqapha isimo njalo basiqapha kuzozonke indawo lapho esipha khona lokhu kudla. Silezisebenzi zethu ezibaleqiniso lokuthi ukudla lokhu kuya ebantwini abafanaleyo lokuthi akuphiwa ngenjongo zezombusazwe. Ngiyaqinisekisa ukuthi ukudla loba imali esiyipha abalambayo kuphiwa abalendingeko kuphela.”

UMnu. Beasley yena ukhuthaza ohulumende ukuthi basungule inhlelo zokulima izilimo ezimelana lokoma.

Uthi ingcitshi kwezokulima ziveza ukuthi ngokuqhubeka kweminyaka isivuno somumbu sizaqhubeka sisehla.

Bedlula izigidi ezilitshumi lanhlanu - 15.5 million - abantu ababhekane lendlala emazweni asezansi yezwekazi le Africa.

Facebook Forum

XS
SM
MD
LG