Inhlanganiso yabapheka isinkwa eye National Bakers Association of Zimbabwe ithi ilakho ukukhweza intengo yabakhuphekayo ngesilinganiso esiphakathi kokulitshumi lanhlanu ekhulwini lamatshumi amabili-15%-20%.
Umnu. Wellington Peyama, omunye wenhlanganiso le, uthi lokhu kubangelwa yikuqonga kwentengo yengqoloyi emhlabeni jikelele.
U Peyama uthi uzulu usezaba lakho ukuthenga isinkwa ngemali edlula kancane idhola elilodwa leMelika-US1,20 nxa intengo yaso ingakhwezwa.
Uphinde wathi ukuqonga kwentengo yesinkwa kulandela isinqumo senhlanganiso ye Grain Millers Association of Zimbabwe ethi izakhweza intengo yengqoloyi ngesilinganiso esingamatshumi ababili lanhlanu ekhulwini.
Amazwe atshiyeneyo ethuswe ngumbiko wokuthi ele Russia elilwisana lomlilo odla amahabula kalisayi kuthengisa ingqoloyi yalo njengoba litshelwe ngamasimu engqoloyi amanengi aba ngumlotha.
Umnu. Roderick Fayayo, isikhulumeli se Bulawayo Progressive Residents Association utshele iStudio 7 ukuthi uzulu sezathwala nzima ngesikhathi sokudla kwetiye yekuseni ngakho-ke sokumele aqalise ukudla amaqebelengwane le mbhambhayila.
