Abaphila ngokuthengisa bathi kabayi ndawo.
Bathi sebelindele abebutho ababikwa bezosetshenziswa ukubasusa emigwaqweni lapho abasebenzela khona ngemva kokuba umphathintambo wombuso wamadolobho lezabelo, uMnu. July Moyo, ethe basuke baye endaweni ezalungiselwa lokho.
Inkulumo yabaphila ngokuthengisa emigwqweni iza ngemva kokuba uMoyo ebanike amahola angamatshumi amane lasitshiyagalombili, esidlule ngoMvulo, ukuba basuke emigwaqweni, bayesebenzela endaweni umanisipala abakhela zona.
Kodwa abenhlanganiso ezimela laba bantu bathi amalunga abo engasoke aya ndawo, bazimisele ukubhekana labebutho nxa bezabasusa ndodlame.
Umqondisi wenhlanganiso yeVendor’s Initiative for Social and Economic Transformation – VISET, uMnu. Samuel Wadzai, utshele umhlangano lentathelizindaba owenzelwe eMedia Centre, ukuba uhulumende kumele aqale alungisise inkinga ezibangele ukwanda kwabaphila ngokuthengisa emigwaqweni engakacabangi ngokubasusa lapho abathengisela khona impahla etshiyeneyo.
UHenry Mateu, oyintathelizindaba, ubeka umlandu abathengisa emigwaqweni laba umlandu wokusekela uhulumende okhona ecabanga ukuba uzokuba ngowahluke lokamnumzana Robert Mugabe.
Usekela umbono wokuba kulungisiswe isisusa esabangela loludubo anduba uhulumende athathe amanyathelo asewathatha.
Abamela amalunga abaphila ngokuthengisa laba bathi okumele uhulumende akwenze yikukhulumisana labo babonisane indlela engasebenza ukulungisisa loludubo hatshi ukumane avuke ubhova nje njengalokho asekwenza.
