amalinks wokungena

Breaking News

Amakhulu Abantu Abaphila Ngokuthengisa Bafola Betshengisela eHarare


Amakhulu abantu abaphila ngokuthengisa ezitaladeni zeHarare, bafole betshengisela basa lencwadi yezikhalazo zabo edale lephalamende, besithi kabasoze basuke lapho abakhona, baze batholiswe indawo ezilungele ukusebenzela.

Abantu laba abavele enhlanganisweni ezehlukeneyo zabaphila ngokuthengisa emigwaqweni, bafole behlabela, belubhekise edale lephalamende, besemgwaqweni, uNelson Mandela ngoLwesithathu.

Kodwa amapholisa abehlomile, abavimbe ukuchapha umgwaqo uSam Nujoma, ophambana lalowo akade behamba ngawo, bucwadlana nje ledale lephalamende.

Umnumzana Patson Murimoga ungubaba osesemutsha otshele intathelizindaba ukuba uphila nzima laye ngangabanye, ngokuthengisa ngoba ingekho imisebenzi.

Bezikhona njalo inkokheli ezivele kunhlangothi ezehlukeneyo ukubasekela laba bantu ngesikhathi befola, okubalisa ummeli wesigaba seBulawayo East, unkosazana Thabitha Khumalo.

UMaKhumalo, oyinkokheli njalo yebandla leMDC-T, uchasisele intathelizindaba ukuba kungani ubetholakala kulombuthano.

Uthi uMaKhumalo, lokhu kukhalaza, kuyisibonelo sokuba asisihle isimo somnotho elizweni, uhulumende weZanu PF kumele azigcwalise izithembiso azenza kuzulu, zokutholisa abantu imisebenzi ethi ngoba ukuswelakala kwayo kuyikho osekubangele ukwanda kwabaphila ngokuthengisa laba ezitaladeni.

Kuvunyelwe abalutshwana balaba bantu ukuyakwethula incwadi yezikhalazo edale lephalamende.Yemukelwe ngosaphethe isikhundla sikanobhala wedale lephalamende unkosikazi Nomasonto Sunga othembise ukuyisa kwabaphezu kwakhe.

Amapholisa enze yonke imizamo ukuvimba abekade betshengisela laba, ukuba bangaze bayafinyelela edale lephalamende.

Lesi sehlakalo siza ngemva kokuba beke bavinjwa ngamapholisa ukufola betshengisela, abaphila ngokuthengisa laba, kwaze kwathi sebetholiswe imvumo lidale leHigh Court izolo ukuba baqhubeke.

XS
SM
MD
LG