Ukonakala komumo womnotho emhlabeni jikelele sekubangele ukuthi inengi labesifazana labanye abesilisa abangasebenziyo ikakhulu emazweni alobuyanga, bacine sebephila ngokuthengisa imizimba yabo.
UBenedict Nhlapho weStudio 7, uxoxa lenhlanganiso ezimela abaphila ngokuthengisa umzimba laba ezisemhlanganweni wokulwisa ukumemetheka kwegcikwane lengculaza eDurban ezithi zifuna abathengisa imizimba laba bavunyelwe ukusebenza ngokusemthethweni.
Ukuphila ngokuthengisa umzimba kuyazakala njengomsebenzi owaqala ukwenziwa kusukela ntolontolo. Noma kunjalo lumsebenzi ulokhe ubonakala njengokungaziphathi longekho emthethweni emazweni amanengi.
Lokhu sekubangele ukuthi abaphila ngokuthengisa umzimba, inhlanganiso zabo lalabo abalwela amalungelo abo bengeze ubizo lwabo lokuthi bavunyelwe ukusebenza ngokusemthethweni.
Inengi labo bangene umhlangano womhlaba jikelele wokulwiswa komkhuhlane wengculaza oqhutshelwa eDurban kweleSouth Africa, lapha asebexwayise ngokuthi ukwenqatshelwa komsebenzi wabolo kulakho ukubangela ukumemetheka kwegciwane lengculaza.
Unkosazana Jules Kim, okhokhela inhlanganiso yabathengisa umzimba eAustralia eye Scarlet Alliance, uthi umcabango wokuthi ukuvumela ukuthengiswa komzimba kuzakwenza kwande ubugebenga lomkhuhlane wengculaza yikho okwenza ohulumende abanengi baphikisane lalokhu. Uthi abakufunayo yikuthi labo basebenze ngokusemthethweni bevikelwa ngumthetho njengazo zonke izisebenzi.
Umnumnzana Cameroon Cox, othengisa umzimba abuye njalo abengumkhokheli wenhlanganiso ye Sex workers Outreach Project eNew South Wales, uthi ukuvunyelwa ngokusemthethweni ukuthengiswa komzimba kuleli lizwe sekwenze abenza lo umsebenzi labo baphatheke ekulwiseni ukumemetheka kwegciwane lengculaza.
Unkosazana Kay Thi Win obona ngokuqhutshwa kwenhlelo zenhlanganiso ye Asia Pacific Network of Sex Workers, uthi phakathi kwamazwe angamatshumi amathathu lasitshiyagalombili eAsia Pacific, linye kuphela eselivumele ukuthengiswa komzimba ngokusemthethweni. Uthi ukwenqabela lokhu kumemethekisa umkhuhlane wengculaza njengoba abathengisa ngomzimba laba bengavunyelwa ukuphumela engcekeni ukuthi yiwo umsebenzi abawenzayo.
Amazwe e Africa lawo ngamanye alokhu esala ukuthi ukuthengiswa komzimba kwenziwe ngokusemthethweni. I Zimbabwe layo ngelinye lalamazwe alokhu esala kodwake bayanda omama beZimbabwe asebephila ngokuthengisa umzimba ngenxa yokusilela kwemisebenzi.
Sebebanengi njalo abeZimbabwe abafika eSouth Africa benze lowo msebenzi. Umnumnzana Katlego Rasibitse, owenhlanganiso yabathengisa umzimba kweleSouth eyeSonke uthi laboke ndawonye labeZimbabwe laba balwela ukuthi bavunyelwe ukusebenza ngokusemthethweni.
Enye into eyenza ukuthi isex work sifune ibe decriminalised, sex workers will never be considered njengezigebengu, into enza ukuthi thina sicindezelwe la eMzansi.
Unkosazana Nkululeko Ndlovu, osebenza kwezempilakahle kodwa yena engathengisi umzimba, uthi kuyadingeka ukuthi kuhlolisiswe izizathoi ezenza umuntu athengise umzimba wakhe.
Ngithi mina ukubona kwami ngibona engathi abantu bangena ukuthi basebenzise kanje imizimba yabo ngenxa yezizatho zobuMpofu, mhlawumbe ekhaya la abavela khona nangendlela abafuna ukwenza ngayo imali esheshayo
Umnumnzana Rasibitse uyalandula ukuthi abathengisa umzimba yibo abamemethekisa umkhuhlane wengculaza.
Amasex workers akusibo abaphusha i HIV ne. For the fact that sex workers are the vulnerable, are the weakest lofunanje ukuthi mhlawumbe ufunanje uku painter, they start with sex workers but ama sex workers we are talking people abayazi icondom ukuthi ifakwa kanjani because as a movement, we teach, we lobby.
Unkosikazi Ndlovu uthi lobanje engelambono ekuthini lo umsebenzi uvunyelwe ngokusemthethweni kumbe hatshi, bukhona ubufakazi bokuthi ukungavunyelwa kwawo kubangela inhlupho kwezempilakahle yabawenzayo, njengoba besesaba ukuthi bafike ezibhedlela bachaze obala ukuthi yiwo umsebenzi abawenzayo. Uthi njalo loba bedlwengulwe besemsebenzini kunzima ukuthi bakuveze lokho.