Abaqeqetshi bomdlalo wenguqu bamaqembu adlalela esigabeni saphezulu ese Premier Soccer League-PSL, bathi sebelungele ukuphindela komdlalo wenguqu enkundleni ibukelwa nguzulu, ngemva kokumiswa okwesikhathi eside ngenxa youqhamuka kobhubhane lweCovid 19.
Abaqeqetshi laba bathi kade baqalisa ukulolonga abadlali emalungiselelweni wokuphindela kwalu mdlalo wenguqu enkundleni ezitshiyeneyo zelizwe.
Abaqeqetshi bamaqembu afana leHighlanders bathembise abalandeli beBosso isikhathi esihle sokulibaziswa lonyaka ngokudlala kwabo kwezinga lapheulu.
Owe Dynamos, uTonderai Ndiraya, utshele iStudio 7 ukuba amalungiselelo awe Dembare okuphindela enkundleni asekusibanga esiphezulu njalo abalandeli babo sebelambele ukuyabukela lumdlalo enkundleni hatshi kumabonakude.
Abenhlanganiso elawula imidlalo yenguqu yezinga laphezulu eye Premier Soccer League- PSL, sebehlele ukuba imidlalo yomncintiswano owe nkezo eyeChibuku Super Cup iqale ukudlalwa kusukela ekupheleni kwayonale inyanga kaMpandula mhlaka 29, kuthi eye league yona iqale ekupheleni kukaMfumfu mhlaka 30.
Umqeqetshi weqembu eleBlack Rhinos, uHebert Marowa, laye utshele iStudio 7 ukuthi bona njengeqembu kabazange bame ukulolonga abadlali ngendlela ezitshiyeneyo ezazingeneliswa ngesikhathi kulandelwa iziqondiso zeCovid 19 Lockdown ngakhoke labo sebelungele ukungena enkundleni yiloba yisiphi isikhathi.
I-Black Rhinos isesibayeni esigoqela amaqembu abalisa i-Tenax, Manica Diamonds leleCranbourne Bullets, umncintisweni owenkezo eyeChibuku Super Cup.
Kodwa ke umqeqetshi oweTriangle, uTaurai Mangwiro, uthi yena labadlali bakhe bahlele ukuguqula ukudlala abakade bekwenza ngaphambilini kokumiswa kwemidlalo yenguqu ngenxa yokuqhamuka kobhubhane olwe Covid 19.
Imidlalo yomncintiswano owenkezo yeChibuku Super Cup ike yasungulwa ngoNhlangula lonyaka kodwa yacina imiswa ngesikhathi somqando ngenxa yokuqonga kwenani labantu ababe sebefunyanwa beleCovid 19, okwabangela ukuthi uhulumende aqinise iziqondiso zokumelana laleli gcikwane ezeLockdown zisuka kuLoevel 2 zisiya kuLevel 4.
Kodwake ekuqaliseni kwayonale inyanga kaMpandula uhulumende wazise ukuba ngokubona inani lasebebanjwa yiCovid 19 elizweni useyekethisa iziqondiso ezeLockdown lemidlalo etshiyeneyo egoqela inguqu layo isizavunyelwa ukuphindela ezinkundleni, elizweni lonke.
Iqembu elizenelisa ukudlala kakuhle likhokhele kuluhlu lwamaqembu adlala ekuPSL yilo elizamela ilizwe emncintisweni womnyaka ozayo owamazwe awezwekazi leAfrica owe Caf Champions League, okuyisicoco ebe siphethwe liqembu lenguqu ele FC Platinum lonyaka.