Abakuhlangothi lwabasakhulayo kubandla le Zanu PF batshengisele ngoLwesine ezitaladini zakoBulawayo besekela ukunanzwa kwelanga lokuzalwa likaMongameli Robert Mugabe.
Abasakhulayo laba, akade behlabela ingoma zenkululeko, bathe bajabulela umbuso kaMugabe njalo sokumele eqalise ukulungiselela ukhetho lomnyaka ozayo.
Bathe uMugabe kumele aqhubeke ebusa loba eseluphele ngoba uthakazelelwa ngabantu abanengi.
Kade bebambisane lenhlangothi zikahulumende ezibalisa ezamajele, amapholisa, iBulawayo Polytech, iEnviromental Management Authority lolwe Zimbabwe Tourism Authority.
Umgcinisihlalo wabasakhulayo webandla leli koBulawayo, uNkosazana Anna Mokgohloa, uthe sebelungele ukuyathakazelela lelilanga eRhodes Estate Preparatory School esiqintini seMatobo esabelweni seMatabeleland South.
Uthe kulabanye abasakhulayo abazimisele ukuhamba ngenyawo eREPS.
Lokhu kugcizelelwe nguAdriana Kanyanewe, osakhulayo webandla le Zanu-PF, othe umumo ongamanga kuhle ezweni uzalunga njalo ilanga lokuzalwa kukaMugabe lilanga okumele balithakazelele nomakanjani.
Okwenziwa nguMugabe sokuchothozwe ngabantu abanengi abathi kuyayangisa akwenzayo ngoba ilizwe kalilamali.
UDokoteela Nkosana Moyo, owake wabangumphathintambo kuhulumende weZanu PF kodwa wabalekela lumsebenzi, uthe uMugabe uqakathekisa ukuzijabulisa lona ilizwe libhekane lobunzima.
UMoyo, osekhokhela inhlanganiso yeMandela Institute for Developement Studies, uthe uMugabe udlalisa imali esenza idili elingasoze lincede uzulu.
Lokhu kusekelwe nguMathew Nyathi, osakhulayo ohlala koBulawayo, othe abantu akumelanga baye edilini leli.
Akade betshengisela ezitaladini bakwenze ngesikhathi uMugabe etshele umsakazo weZimbabwe Broadcasting Corporation ukuthi okwamanje akulamuntu okhaliphiliyo ongathatha isikhundla sakhe.
